गोकुळ वादावर सतेज पाटील यांची संघर्ष मोर्चाची घोषणा

गोकुळ दूध संघाच्या निवडणुकीचा वाद काही थांबण्याचे नाव घेत नाही. गोकुळ संघावर राज्य सरकारने पाच संचालक नेमले आहेत. गोकुळच्या निवडणुकीमध्ये महायुतीला मोठा धक्का बसला. एका जागेने महायुतीला या निवडणुकीत धक्का बसला. एकट्या सतेज पाटील सर्वांवर भारी पडले होते. त्यातच सरकारने गोकुळवर मोठी खेळी केली. गोकुळ संघ ताब्यात घेण्याचा हा सरकारचा डाव असल्याचा आरोप सतेज पाटील यांनी केला.

पाच सदस्यांच्या नियुक्तीने चित्र बदलले

गोकुळमध्ये सतेज पाटील यांच्या गटाला बहुमत मिळाले होते. त्यांना १३ जागा मिळाल्या होत्या. पण आता सरकारने बाहेरून पाच सदस्य नियुक्त करून संपूर्ण चित्रच बदलून टाकले आहे. या पाच स्वीकृत सदस्यांना सहकारी संस्थांवर मतदानाचा अधिकारही देण्यात आला आहे. विरोधकांकडून होणाऱ्या आरोपांवर मंत्री हसन मुश्रीफ यांनी जोरदार टीका केली. गोकुळच्या मुद्द्यावर राहुल गांधी यांनीही भाष्य केले आहे.

पत्रकार परिषदेत गंभीर आरोप

त्यातच आता सतेज पाटील यांनी पत्रकार परिषद घेत सरकारवर गंभीर आरोप केले. कोल्हापूरकरांचा कौल नाकारण्याचे काम सरकार करत असल्याचे ते म्हणाले. शेतकऱ्यांचे बहुमत सरकारने नाकारले आहे. शेतकऱ्यांचा मॅन्डेटही सरकार नाकारत आहे. सत्ता मिळवण्यासाठीच कॅबिनेटमध्ये कायदा बनवण्यात आला, असा आरोप त्यांनी केला. ज्यांना जनतेने नाकारले ते तज्ज्ञ कसे, असा मोठा सवालही सतेज पाटील यांनी उपस्थित केला. हा डेडलॉक नाही, तर लोकशाही डेडलॉक करण्याचा प्रयत्न असल्याचे त्यांनी म्हटले. तांत्रिक मुद्दा करून सरकारने आमचे बहुमत नाकारले, असेही ते म्हणाले. संचालक नेमके होते, हायकोर्टाने ते नाकारले. कोर्टात निर्णय होईल आणि आमचा कोर्टावर पूर्ण विश्वास असल्याचे त्यांनी सांगितले. कोर्टात दिलासा मिळणार नाही म्हणून सरकारने आदेश काढल्याचा आरोपही त्यांनी केला.

९ नोव्हेंबरला संघर्ष मोर्चा

कोल्हापूरकरांचा अपमान सरकारने केला आहे. हा स्वाभिमानी कोल्हापूरच्या जनतेचा अपमान असल्याचे सतेज पाटील म्हणाले. याविरोधात रस्त्यावर उतरणार असल्याची घोषणा त्यांनी केली. ९ तारखेला सकाळी दहा वाजता दसरा चौक येथून कोल्हापूरचा संघर्ष मोर्चा काढण्यात येणार आहे. हा मोर्चा जिल्हाधिकारी कार्यालयापर्यंत जाणार आहे. न्यायालयीन लढाईही आम्ही करूच, पण हा मोर्चाही काढणार असल्याचे त्यांनी स्पष्ट केले. कोल्हापूरकरांना हा अपमान असल्याचे सांगत त्यांनी मोर्चात सहभागी होण्याची विनंती केली आहे.

स्रोत: मूळ बातमी