भारतीय क्रिकेटमध्ये विराट कोहलीचे नाव मोठ्या आदराने आणि कौतुकाने घेतले जाते. जगभरातील क्रिकेटप्रेमींमध्ये तो एक महान आणि लोकप्रिय खेळाडू म्हणून ओळखला जातो. चाहत्यांनी त्याला किंग, चेस मास्टर आणि रन मशीन अशी विशेषणे दिली आहेत. सर्वाधिक विजय मिळवून देणारा आणि सलग तीन कसोटी गदा जिंकणारा भारताचा सर्वात यशस्वी कसोटी कर्णधार म्हणूनही त्याची नोंद आहे. जगातील महान फलंदाजांच्या यादीत त्याचे नाव सातत्याने घेतले जाते. कोहलीने २०२४ मध्ये टी-२० आंतरराष्ट्रीय क्रिकेटमधून, तर मे २०२५ मध्ये कसोटी क्रिकेटमधून निवृत्ती घेतली.
परिश्रम आणि समर्पण हेच यशाचे सूत्र
कोहलीच्या यशामागे कठोर परिश्रम आणि पूर्ण समर्पण असल्याचे त्याच्या वाटचालीवरून दिसते. लहानपणापासून बॅट हाती घेऊन भारतासाठी सामने जिंकण्याचे स्वप्न त्याने पाहिले होते आणि त्याच स्वप्नाने त्याला क्रिकेटची वाट निवडायला प्रवृत्त केले. इतर लोक त्याच्या वागणुकीबद्दल, खेळाबद्दल किंवा भवितव्याबद्दल काहीही बोलले, तरी त्यापासून आपले लक्ष विचलित होऊ द्यायचे नाही, असा त्याचा दृष्टिकोन राहिला आहे. मैदानावर फलंदाजाला एकट्यानेच चेंडूला सामोरे जावे लागते आणि अपयश आले तर त्याची जबाबदारीही स्वतःवरच घ्यावी लागते, त्यामुळे प्रत्येकाने स्वतःचे निर्णय स्वतः घ्यायला हवेत, असे तो मानतो. तंदुरुस्त शरीर आत्मविश्वास देते, पण आत्मविश्वास आणि उद्धटपणा यातला फरक ओळखणेही तितकेच महत्त्वाचे आहे. शिकण्याची तयारी कायम ठेवली, तर प्रगतीची दारे उघडी राहतात.
अपयशानंतरही प्रयत्न न थांबवणे
आपल्या कारकिर्दीत अनेक वेळा अपयश आले, तरी प्रयत्न करणे कधीही थांबवले नाही, असे कोहलीचे म्हणणे आहे. यश हे केवळ मेहनतीतूनच मिळते आणि मेहनतीला दुसरा कोणताही पर्याय नाही, हा त्याचा ठाम विश्वास आहे. अभिमान सोडून द्यावा, स्वतःची ताकद ओळखावी आणि कमकुवत बाजूंवर काम करावे, असा सल्ला तो देतो. स्वप्नांचा पाठलाग करताना पूर्ण यश मिळाले नाही, तरी त्या ध्येयाच्या जवळ नक्की पोहोचता येते. मनःशांती त्याच्यासाठी खूप महत्त्वाची असून, स्वतःशी प्रामाणिक राहून आवडते काम करणे हेच त्याचे तत्त्व आहे. खेळ असो, करिअर असो किंवा वैयक्तिक ध्येय असो, शिस्त राखून आपल्या आवडीत पूर्णपणे मग्न राहिल्याने यश आणि समाधान दोन्ही मिळू शकते, असा संदेश त्याच्या विचारांतून मिळतो.
स्रोत: मूळ बातमी
Leave a Reply