पुणे: पुणे क्रिकेट ॲकॅडमी आणि सागर कांबळे यांच्या वतीने आयोजित पुणे क्रिकेट मान्सून करंडक आंतरक्लब १४ वर्षांखालील स्पर्धेत फॅन्टम क्रिकेट ॲकॅडमीने विजेतेपद पटकावले. अंतिम सामन्यात असिम मुजावर याने केलेल्या नाबाद ८५ धावांच्या शानदार खेळीच्या जोरावर फॅन्टमने स्पेशलाईज्ड स्पोर्ट्स क्लबचा ५३ धावांनी पराभव केला.
सातारा रोड येथील टेंभेकर फार्म्सच्या मैदानावर झालेल्या अंतिम सामन्यात फॅन्टम क्रिकेट ॲकॅडमीने नाणेफेक जिंकून प्रथम फलंदाजी करण्याचा निर्णय घेतला. मात्र, संघाची सुरुवात अडखळती झाली. ठराविक अंतराने फलंदाज बाद होत गेल्याने १३ षटकांत फॅन्टमची अवस्था ६५ धावांत आठ गडी बाद अशी झाली होती.
असिमची निर्णायक खेळी
अशा बिकट परिस्थितीत नवव्या क्रमांकावर फलंदाजीस आलेल्या असिम मुजावरने आक्रमक फलंदाजी करत संघाचा डाव सावरला. त्याने अवघ्या ४२ चेंडूंत १० चौकार आणि ५ षटकारांच्या मदतीने नाबाद ८५ धावांची खेळी केली. त्याला तनिष्क जाधवने १० धावांची साथ दिली. या दोघांनी नवव्या गड्यासाठी ६४ चेंडूंत ८७ धावांची निर्णायक भागीदारी केली. त्यामुळे फॅन्टम संघाने २५ षटकांत ९ गडी गमावून १७६ धावांचे आव्हान उभे केले.
पारितोषिक वितरण उत्साहात
विजयासाठी १७७ धावांचे लक्ष्य घेऊन मैदानात उतरलेल्या स्पेशलाईज्ड स्पोर्ट्स क्लबचा डाव १९.४ षटकांत १२३ धावांवर आटोपला. इशान माळीने ३० धावांची खेळी करत प्रतिकार केला. मात्र, फॅन्टमच्या गोलंदाजांनी अचूक मारा करत विजयावर शिक्कामोर्तब केले. नकूल राठोड आणि राफेल विगेस यांनी प्रत्येकी तीन, तर तनिष्क जाधवने दोन गडी बाद केले. स्पर्धेचे पारितोषिक वितरण स्पर्धा संचालक सागर कांबळे, स्पेशलाईज्ड संघाचे प्रशिक्षक सागर सांगळे, फॅन्टम संघाचे प्रशिक्षक अक्षय सालवे, शाम गोगल, सुजल मोरे आणि गोरख वाडकर यांच्या हस्ते झाले. विजेत्या फॅन्टम क्रिकेट ॲकॅडमी आणि उपविजेत्या स्पेशलाईज्ड स्पोर्ट्स क्लबला करंडक व पदके देऊन गौरविण्यात आले.
स्रोत: मूळ बातमी
Leave a Reply