सिन्नरमधील प्रभाग क्रमांक नऊचा विस्तार दयानंद मठापासून आडव्या फाट्यापर्यंत आणि एस. टी. कॉलनीपासून हांडे मळा व नायगाव रोडपर्यंत पसरलेला आहे. याच प्रभागात पवित्र सरस्वती नदीचा उगम होतो आणि नदीचा सुमारे ८० टक्के भाग याच प्रभागातून वाहतो. मात्र वाढत्या शहरीकरणामुळे या नदीला तिचे गतवैभव मिळवून देणे काळाची गरज बनली आहे. उपनगरांचा विस्तार होत असतानाच येथील मूलभूत समस्यांमध्येही वाढ झाली आहे.
सुशोभीकरण रखडले, अतिक्रमणे मुख्य अडचण
सरस्वती नदीचे सुशोभीकरण १० वर्षांपूर्वी हाती घेण्यात आले होते, परंतु ते काम रखडले. आता पुन्हा एकदा सुशोभीकरण करण्याबाबत चर्चा सुरू आहेत. नुकताच नदीपात्रातून २०० हून अधिक डंपर गाळाचा उपसा करण्यात आला असला, तरी नदीपात्रातील वाढलेली अतिक्रमणे हा येथील मुख्य प्रश्न बनला आहे. हे अतिक्रमण काढण्यासाठी अद्याप कोणतीही ठोस कार्यवाही झालेली दिसत नाही. दुसरीकडे सिडकोनगर, विनरनगर, साईदत्तनगर, आयटीआय परिसर, संभाजीनगर आणि सप्तशृंगीनगर या उपनगरांमध्ये आजही पक्के कॉलनी रस्ते, पुरेशी सांडपाणी व्यवस्था व ड्रेनेज लाइनचा अभाव जाणवतो. काही प्रमुख रस्त्यांचे प्रश्न मार्गी लागले असले, तरी अंतर्गत रस्ते आणि गटारींच्या व्यवस्था अजूनही अपूर्ण आहेत.
सोडवलेले प्रश्न आणि नियोजित प्रस्ताव
काही प्रश्न मात्र मार्गी लागले आहेत. आयटीआय परिसर पूर्वी ग्रामीण फिडरवर होता, त्यामुळे भारनियमन मोठ्या प्रमाणात होते. आता त्यासाठी स्वतंत्र फिडर असल्याने वीज समस्या सुटली आहे. गोजरे मळ्यात गटारीची व्यवस्था नव्हती, ती पूर्णत्वास गेली आहे. प्रभागात तीन ठिकाणी रोहित्र बसवण्यात आले आहेत. इतर उपनगरांत कचरा संकलन आणि पथदीपांचे प्रश्न सुटले आहेत. एसटी कॉलनी परिसरात सिमेंट काँक्रीट रस्ते झाले आहेत आणि सिद्धेश्वर नगरात नमो उद्यान विकसित होत आहे. प्रभागासाठी सरस्वती नदीच्या सुशोभीकरणासाठी ४१ कोटी रुपये, गोविंद गोपाळ ते दयानंद मठ जॉगिंग ट्रॅक, ईदगाह मैदान ते गोजरे मळा वहिवाट रस्ता आणि पिंप्री रोड ते नायगाव रोड ते सिन्नर महाविद्यालय २४ मीटर मार्ग असे प्रस्ताव नियोजित आहेत. नागरिकांनी उपनगरांचे सांडपाणी महाविद्यालयासमोरील शेतजमिनीत सोडले जात असल्याचा १५ वर्षांचा प्रश्न, ईदगाह रोड ते गोजरे मळा वहिवाट रस्ता, तसेच सप्तशृंगी परिसरात कच्च्या रस्त्यांचे काँक्रीटीकरण आणि बंदिस्त गटारींची गरज मांडली आहे.
स्रोत: मूळ बातमी
Leave a Reply