नाशिकमध्ये प्रेशर गनचा खिळा लागून तरुणाचा मृत्यू

नाशिकच्या सिडको परिसरातील स्टेट बँक चौकाजवळ असलेल्या एका दुकानात प्लायवुडला खिळे ठोकण्याचे काम सुरू असताना प्रेशर गनमधून सुटलेला खिळा काऊंटरवर बसलेल्या तरुणाच्या पोटात शिरला. मोठ्या प्रमाणात रक्तस्त्राव झाल्याने त्याला खासगी रुग्णालयात दाखल करण्यात आले, मात्र उपचारादरम्यान त्याचा दुर्दैवी मृत्यू झाला.

सोमवारी, २ नोव्हेंबर रोजी सायंकाळी सातच्या सुमारास ही घटना घडली. मृत तरुणाचे नाव सुनील अनिल तायडे (वय ३९, राहणार इन्कमटॅक्स कॉलनी, अंबड लिंक रोड) असे आहे. जवळच प्लायवुडला प्रेशर गनने खिळे ठोकले जात असताना अचानक उडालेला खिळा त्यांच्या पोटात आरपार शिरला. त्यानंतर सुरू झालेल्या रक्तस्त्रावामुळे त्यांची प्रकृती गंभीर झाली. पत्नी दीपाली तायडे यांनी त्यांना खासगी रुग्णालयात दाखल केले. तेथे उपचार सुरू असताना डॉ. विशाल करंवदे यांनी त्यांना मृत घोषित केले.

सीसीटीव्ही फुटेजवरून प्रश्नचिन्ह

या घटनेचे सीसीटीव्ही फुटेज समोर आल्याने घटनेच्या नेमक्या स्वरूपाबाबत प्रश्न उपस्थित होत आहेत. हा केवळ अपघात होता की यामागे घातपाताची शक्यता आहे, हे अद्याप स्पष्ट झालेले नाही. सीसीटीव्ही फुटेज, प्रत्यक्षदर्शींचे जबाब आणि घटनास्थळावरील परिस्थिती तपासल्यानंतरच सत्य समोर येणार आहे. अंबड पोलिसात अकस्मात मृत्यूची नोंद करण्यात आली असून पोलिस निरीक्षक अविनाश नडविनकेरी या घटनेचा सखोल तपास करत आहेत. पोलिस तपासात नेमके काय निष्पन्न होते, याकडे सिडकोतील नागरिकांचे लक्ष लागले आहे.

स्रोत: मूळ बातमी