कल्याणमधील आधारवाडी कारागृहाजवळ असलेल्या जेल तलावाच्या स्वच्छतेसाठी सोलस इंडियाने आपले १०१ वे अभियान राबवले. या मोहिमेदरम्यान तलावातील प्रदूषणाचा प्रश्न पुन्हा एकदा चर्चेत आला. तलावात सांडपाणी मिसळत असल्याने आणि नागरिकांकडून कचरा टाकला जात असल्याने पाण्याची गुणवत्ता दिवसेंदिवस खालावत असल्याचे या वेळी समोर आले. या अभियानात दाऊदी बोहरा समाजातील सदस्यांनी उत्स्फूर्त सहभाग नोंदवत स्वच्छता आणि सामाजिक एकतेचा संदेश दिला.
सांडपाणी आणि कचऱ्यामुळे पाणी दूषित
सोलस इंडियाच्या राष्ट्रीय संयोजक डॉ. रुपिंदर कौर यांनी तलावाच्या प्रदूषणाबाबत चिंता व्यक्त केली. कारागृहातून बाहेर पडणारे सांडपाणी थेट तलावात मिसळत असल्याने पाणी दूषित होत असल्याचे त्यांनी सांगितले. त्याशिवाय नागरिकांकडून प्लॅस्टिक, जुने कपडे, चपला-बूट आणि निर्माल्य तलावात टाकले जात असल्याने प्रदूषणात आणखी भर पडत आहे. दरवर्षी गणेश विसर्जनासाठी या तलावाचा वापर होतो, मात्र विसर्जनानंतर तलावाची योग्य स्वच्छता आणि देखभाल होत नसल्याकडेही त्यांनी लक्ष वेधले.
स्वच्छतेची जबाबदारी कोणाची, यावर प्रश्न
तलावात मिसळणाऱ्या सांडपाण्याचा स्रोत शोधून तो बंद करावा, पाण्याची गुणवत्ता नियमितपणे तपासावी आणि कचरा टाकणाऱ्यांवर कारवाई करावी, अशी मागणी डॉ. कौर यांनी केली. तलावाची मालकी नेमकी कोणाकडे आहे आणि त्याच्या स्वच्छतेची जबाबदारी कल्याण-डोंबिवली महापालिकेची किती, याबाबत स्पष्टता असायला हवी, असेही त्यांनी म्हटले. सार्वजनिक निधीतून खासगी मालमत्तेची स्वच्छता करण्यासाठी निविदा काढण्याच्या प्रक्रियेवरही त्यांनी प्रश्न उपस्थित केले. या अभियानात रत्नेश महाडिक, स्वप्नील म्हात्रे, देवेंटरी शर्मा यांच्यासह अनेक सामाजिक कार्यकर्ते सहभागी झाले होते. तलावाचे प्रदूषण रोखण्यासाठी प्रशासन आणि नागरिकांनी संयुक्तपणे जबाबदारी घ्यायला हवी, असा सूर या वेळी उमटला. स्वच्छता ही एका दिवसापुरती न राहता सातत्याने राबवली जाणारी सामूहिक जबाबदारी असायला हवी, असे डॉ. कौर यांनी स्पष्ट केले.
स्रोत: मूळ बातमी
Leave a Reply