येत्या काळात हिरव्या चाऱ्याची टंचाई निर्माण होण्याची शक्यता लक्षात घेता पशुपालकांनी प्रतिबंधात्मक उपाययोजना करणे गरजेचे आहे. आधुनिक तंत्रज्ञानाचा वापर करून चारा उत्पादन वाढवावे, असे आवाहन जिल्हा पशुसंवर्धन उपायुक्त डॉ. प्रदीप झोड यांनी केले. जामनेर तालुक्यातील हिवरखेडा येथे आयोजित चारा साक्षरता व संवर्धन अभियानात ते प्रमुख पाहुणे म्हणून बोलत होते. हा कार्यक्रम जिल्हा पशुसंवर्धन विभाग आणि जामनेर पंचायत समिती यांच्या संयुक्त विद्यमाने आयोजित करण्यात आला होता.
चारा संवर्धनाचे प्रात्यक्षिक
कार्यक्रमात मान्यवरांच्या हस्ते वृक्षारोपण करण्यात आले. तसेच कृष्णप्रिया गोशाळेच्या चारा गोदामाचे उद्घाटन आणि गोशाळेने तयार केलेल्या गोखरू व सेंद्रिय कंपोस्ट खताचे अनावरण करण्यात आले. निकृष्ट चारा सकस करण्यासाठी युरिया प्रक्रिया कशी करावी, याचे प्रत्यक्ष प्रात्यक्षिक सहाय्यक आयुक्त पशुसंवर्धन डॉ. श्रीकांत व्यवहारे यांनी सादर केले. सहाय्यक आयुक्त पशुसंवर्धन डॉ. स्वप्नजा लोखंडे यांनी प्रास्ताविक केले आणि तालुक्यातील पशुपालकांनी चारा बियाण्यांची मागणी नोंदवावी, असे सांगितले. डॉ. संदीप पाटील यांनी सूत्रसंचालन केले, तर डॉ. अमोल वराडे आणि गोशाळेचे संचालक दीपक पाटील यांनी परिश्रम घेतले.
पाणी बचतीवर भर
जामनेरचे तहसीलदार नानासाहेब आगळे यांनी पशुपालकांनी स्वतः चारा पिकांची लागवड करून उपलब्ध चाऱ्याची बचत व योग्य नियोजन करावे, असे आवाहन केले. माजी पंचायत समिती सदस्य अमर पाटील यांनी पाणी व्यवस्थापन आणि पाणी बचतीचे महत्त्व विशद केले. सहाय्यक गट विकास अधिकारी कैलास काळे यांनी विकसित भारत रोजगार व आजीविका योजनेची माहिती देऊन पात्र लाभार्थ्यांनी नावनोंदणी करण्याचे आवाहन केले.
स्रोत: मूळ बातमी
Leave a Reply