यंदाच्या खरीप हंगामात अपुऱ्या पावसामुळे इगतपुरी तालुक्याच्या पूर्व भागातील शेतकरी पूर्णपणे अडचणीत सापडला आहे. पावसाच्या कमतरतेमुळे या भागातील भात शेती पूर्णपणे करपून गेली आहे. मुख्य अन्नधान्य असलेले भात पीक हातातून गेल्याने उत्पादक शेतकरी संकटात सापडला आहे. गावागावांत तीव्र पाणीटंचाई निर्माण होऊ लागली असून येत्या काळात माणसांसह जनावरांच्या पिण्याच्या पाण्याचा प्रश्न अत्यंत गंभीर बनला आहे.
चाळीस वाड्या-वस्त्यांवर दुष्काळाची झळ
अपुऱ्या पावसाचा फटका इगतपुरी तालुक्याच्या पूर्व भागातील टाकेद परिसरातील जवळपास चाळीस वाड्या-वस्त्या आणि जवळपास पंचवीस ग्रामपंचायत कार्यक्षेत्रांना बसला आहे. बागायत शेतीचेही मोठे नुकसान झाले आहे. दुष्काळी परिस्थितीमुळे भात शेतीतील जमिनीला पूर्णपणे भेगा पडल्या असून नद्या, नाले आणि ओहळ पूर्णतः कोरडे पडले आहेत. कूपनलिका आणि विहिरीतील पाण्यावर काही शेतकरी भात शेतीला कसेबसे पाणी देत आहेत. मात्र त्यातही विजेचा लपंडाव सुरू असल्याने शेतकरी पूर्णतः हतबल झाला आहे.
पिण्याचे पाणी आणि चाऱ्याचा प्रश्न
पावसाअभावी स्थानिक जलस्रोत, विहिरी, कूपनलिका आणि धरणे चालू वर्षी ऑक्टोबरमध्येच तळ गाठू लागली आहेत. त्यामुळे अनेक गावांमध्ये भविष्यात पिण्याच्या पाण्यासाठी महिलांना वणवण फिरावे लागणार आहे. शेती तर दूरच, पण साधे पिण्याचे पाणीही मिळेनासे झाले तर ग्रामीण भागात टँकरची मागणी यावर्षी मोठ्या प्रमाणात वाढणार आहे. शेतीसोबतच पूरक व्यवसाय असलेल्या दुग्ध व्यवसायालाही या दुष्काळाचा मोठा फटका बसला आहे. चारा पिकांची लागवड न झाल्यामुळे गुरांच्या चाऱ्याचा गंभीर प्रश्न निर्माण झाला आहे. पाणी आणि चाऱ्याअभावी शेतकरी आपली जनावरे कवडीमोल भावाने विकण्यास हतबल झाले आहेत. या पार्श्वभूमीवर शेतकऱ्यांनी हेक्टरी ठोस आर्थिक मदत जाहीर करण्याची, टंचाईग्रस्त गावांमध्ये तातडीने टँकरद्वारे पाणीपुरवठा सुरू करण्याची, पीक कर्ज माफ करून पुढील हंगामासाठी तातडीने मदत देण्याची आणि पीक विम्याची रक्कम कोणतीही दिरंगाई न करता शेतकऱ्यांच्या खात्यात जमा करण्याची मागणी केली आहे.
स्रोत: मूळ बातमी
Leave a Reply