मोठमोठ्या इमारती बांधल्या जातात. त्यात राहणाऱ्यांसाठी लिफ्ट, पार्किंग आणि अनेक सुविधा असतात. पण ज्या मजुरांच्या घामातून या इमारती बांधल्या जातात, त्यांना त्या सुविधांपासून दूर ठेवले जाते. याचाच एक व्हिडिओ सध्या सोशल मीडियावर व्हायरल होत आहे. या व्हिडिओमध्ये मजूर डोक्यांवर विटांचा भार घेत २१ मजले चढून जात असल्याचे दिसते.
व्हायरल व्हिडिओमध्ये एक मजूर डोक्यावर विटा ठेवून इमारतीच्या जिन्याने वर जाताना दिसतो. त्याच्या डोक्यावर साधारण २० किलो वजनाच्या विटा असल्याचे त्या व्हिडिओमध्ये सांगण्यात आले आहे. पायऱ्या चढताना त्याला डोक्यावरचा भार सांभाळावा लागतो आणि त्यात लागणारी धाप पाहून एखाद्याने किती हाल सोसावे, याची कल्पना येते.
चार लिफ्ट असूनही लिफ्ट वापरण्यास मनाई?
हा व्हिडिओ शूट करणाऱ्या व्यक्तीने इमारतीत चार लिफ्ट असल्याचे सांगितले आहे. मात्र मजुरांना लिफ्ट वापरण्याची परवानगी नसल्याचा दावा व्हिडिओमध्ये करण्यात आला आहे. मजुरांना अशा प्रकारे विटा न्यायला सांगायच्याच का, असा सवाल नेटकऱ्यांनी उपस्थित केला आहे. सामानासाठी सर्व्हिस लिफ्ट किंवा बांधकाम साहित्य उचलणारी यंत्रे यांचा वापर करता आला असता, असेही म्हटले जात आहे.
इमारत कुठली, हे अद्याप स्पष्ट नाही
ही इमारत नक्की कुठे आहे आणि हा व्हिडिओ नक्की कुठला आहे, याची माहिती स्पष्ट झालेली नाही. तसेच मजुरांना लिफ्ट वापरण्यास परवानगी नसल्याचा दावा करण्यात आला असला तरी इमारतीच्या व्यवस्थापनाकडून याबाबत कोणतीही अधिकृत माहिती किंवा प्रतिक्रिया समोर आलेली नाही. त्यामुळे व्हिडिओतील दावे अद्याप अपुष्ट आहेत. तरीही या व्हिडिओमुळे मजुरांची मेहनत, त्यांची सुरक्षितता आणि कामाच्या ठिकाणी मिळणाऱ्या मूलभूत सुविधांबाबत पुन्हा एकदा चर्चा सुरू झाली आहे. शहरातील उंच इमारती उभ्या करणाऱ्या हातांनाही सन्मान आणि सुरक्षित कामाची परिस्थिती मिळायला हवी, अशी भावना नेटकऱ्यांनी व्यक्त केली आहे.
स्रोत: मूळ बातमी
Leave a Reply