जळगाव जिल्ह्यासह खानदेशात यंदा सप्टेंबरमध्येच पाऊस बंद झाला आणि त्यानंतर पाऊस झालाच नाही. त्याचा थेट परिणाम नद्यांवर झाला आहे. गिरणा, तापी आणि अनेर या नद्या ऑगस्टमध्ये प्रवाही होत्या, मात्र सप्टेंबरमध्ये त्यांचा प्रवाह बंद होऊ लागला. आजघडीला गिरणा आणि अनेर नद्या कोरड्या झाल्याची स्थिती आहे.
पाऊसमान कमी राहिल्याने नद्यांच्या उगमक्षेत्रात पाण्याचे स्रोतच नव्हते. यंदा ऑगस्टमध्ये फक्त दोनच दिवस काही भागात पाऊस झाला आणि त्यानंतर जोरदार पाऊस आलाच नाही. अनेक भागांत नद्यांमध्ये वाळू आणि माती टाकून कच्चे पूल व रस्ते तयार करून वाहतूक सुरू झाली आहे. तापी नदीवरील भुसावळनजीकच्या हतनूर प्रकल्पातून अनेक दिवसांपासून पाण्याचा विसर्ग बंद झाला आहे. गिरणा नदीवरील गिरणा धरणातूनही विसर्ग सप्टेंबरमध्येच बंद झाला आहे. त्यामुळे नदीत पाणी नाही; जेथे मोठे खड्डे आणि डोह आहेत, तेथेच तापी व गिरणा नदीत पाणी शिल्लक आहे.
नोव्हेंबरमध्येही प्रवाही असणाऱ्या नद्या यंदा कोरड्या
मागील हंगामात किंवा पावसाळ्यात अनेक नद्या नोव्हेंबरमध्येही प्रवाही असायच्या. परंतु यंदा प्रमुख नद्या कोरड्याठाक पडल्या आहेत. त्यामुळे नदीकाठी काही दिवसांतच टंचाई तयार होईल, अशी चिंता व्यक्त होत आहे. अनेक गावांत जानेवारीतच टंचाई जाणवेल, असा अंदाज आहे. या पार्श्वभूमीवर नद्यांमध्ये पाणी सोडण्याची मागणी पुढील काळात केली जाईल, असेही दिसत आहे.
स्रोत: मूळ बातमी
Leave a Reply