सह्याद्रीच्या कुशीत वसलेल्या साक्री तालुक्यातील आमळी परिसरातील अलालदरी धबधब्यांचे निसर्गवैभव पर्यटकांना भुरळ घालत आहे. पावसाळ्यात हिरवाईने नटणाऱ्या आणि आठ ते नऊ धबधब्यांनी सजणाऱ्या या परिसरात महाराष्ट्रासह गुजरातमधील पर्यटकांची गर्दी वाढत आहे. मात्र, पर्यटनविकासासाठी आवश्यक रस्ते, सुरक्षा व्यवस्था आणि मूलभूत सुविधांची प्रतीक्षा अजूनही कायम आहे.
धार्मिक, ऐतिहासिक आणि निसर्ग पर्यटनाचा संगम
निसर्गाचे भरभरून देणे लाभलेला आमळी परिसर धार्मिक, ऐतिहासिक पर्यटनासोबतच निसर्ग पर्यटनाच्या दृष्टीनेही पर्यटकांना आकर्षित करत आहे. या परिसरात मोठ्या प्रमाणावर पाऊस कोसळतो. पावसाळ्यात हिरवाईने आणि मनसोक्त कोसळणाऱ्या धबधब्यांनी अलालदरी परिसराने राज्यासह परराज्यातील पर्यटकांचे लक्ष वेधून घेतले आहे. येथे वर्षभर पर्यटकांचा राबता असतो आणि दरवर्षी गर्दीत मोठी वाढ होत आहे. आमळी येथील सुप्रसिद्ध कन्हैयालाल महाराज मंदिरापासून अवघ्या दोन किलोमीटरवर निसर्ग पर्यटनाचे केंद्रबिंदू म्हणून अलालदरी धबधबा ओळखला जातो. बहुतांश पर्यटक अलालदरीतील निसर्ग आणि धबधब्यांच्या आकर्षणातून येथे येत असतात.
उंची, विस्तार आणि प्रमुख धबधबे
आमळी परिसराला पावसाचे आघार म्हटले जाते. गेल्या वर्षीच्या तुलनेत यंदा कमी पाऊस झाल्यानंतरही येथे हिरवाई कायम आहे, यामुळेच पर्यटकांना भुरळ पडत आहे. नागपूर-सुरत महामार्गावरील कोंडाईबारीपासून १३ किलोमीटरवर आमळी आहे. समुद्रसपाटीपासून १८६० फूट उंच असणारा हा देखणा परिसर अतिशय निसर्गरम्य आहे आणि अलालदरी परिसराचे क्षेत्र सुमारे ४.७० किलोमीटर आहे. उत्तरेकडील पूर्ण भाग संरक्षित जंगलाचा आणि दऱ्याखोऱ्यांचा असून काही अंतरावर नंदुरबार जिल्ह्याची हद्द सुरू होते. दरीत पावसाळ्यात तब्बल आठ ते नऊ धबधबे कोसळतात. पश्चिमेस असणारा ३०० फुटावरून कोसळणारा मुख्य कन्हैयालाल धबधबा पर्यटकांच्या आनंदात मोठी भर घालतो. मत्स्य आणि जांभाळी आदी धबधबे पर्यटकांचे विशेष आकर्षण ठरतात. हा संपूर्ण परिसर वन विभागाच्या ताब्यात असून तो कक्ष क्रमांक १८० व १८२ मध्ये येतो. दरीपासून उत्तर व पूर्वेला दोन हजार १०९ हेक्टर क्षेत्रात जंगल आहे. परिसरात धनसरा टेकडी, काबऱ्याखडक, मालनगाव धरण आणि मालनगाव धरणाजवळ वनविभागाची अडीच हेक्टर क्षेत्रातील रोपवाटिका यांसारख्या विविध ठिकाणांचा समावेश आहे. मात्र, येथे अजूनही चांगले रस्ते, संरक्षणासाठी बॅरिकेट्स आणि विविध सोयी-सुविधांचा मोठा अभाव आहे.
अलालदरीला कसे पोहोचाल?
अलालदरीला जाण्यासाठी धुळे शहरापासून ९५ किलोमीटर, नाशिकपासून १९५ किलोमीटर, नंदुरबारपासून ५४ किलोमीटर, नवापूरपासून ५० किलोमीटर, साक्रीपासून ४० किलोमीटर आणि दहिवेलपासून २० किलोमीटर अंतर आहे. वर्षभर येथे पर्यटकांची वर्दळ असते, त्यामुळे पावसाळ्यात तर राज्यासह लगतच्या गुजरातमधील पर्यटकांचेही हे ठिकाण लक्ष वेधून घेते.
स्रोत: मूळ बातमी
Leave a Reply