सिन्नर येथील बसस्थानक परिसरात चार्जिंग स्टेशन उभारण्यासाठी करण्यात आलेल्या वृक्षतोडीला देण्यात आलेल्या परवानगीची चौकशी करावी, या मागणीसाठी राष्ट्रवादी काँग्रेस (शरदचंद्र पवार) पक्षाने गुरुवारी वन विभाग कार्यालयासमोर धरणे आंदोलन केले. पक्षाच्या कार्यकर्त्यांनी वनपरिक्षेत्र अधिकारी हर्शल पारेकर यांना मागण्यांचे निवेदन दिले.
आंदोलनादरम्यान वन विभागाच्या अधिकाऱ्यांनी आंदोलकांना सांगितले की, चार्जिंग स्टेशनच्या जागेवरील वृक्षतोडीस वन विभागाने परवानगी दिलेली नाही. मात्र बसस्थानकाजवळ अनेक वर्षांपासून मोठी व डेरेदार झाडे तोडली जात असल्याचा आरोप आंदोलकांनी केला. त्यामुळे शेकडो पक्षी बेघर होत असून पक्ष्यांचा किलबिलाट कमी होत असल्याचे निवेदनात नमूद करण्यात आले आहे.
अन्य प्रकरणांचीही चौकशी व्हावी
वृक्षतोड करणाऱ्यांवर कठोर कारवाई करावी, ग्रामीण भागातील वृक्षतोड तातडीने थांबवावी, अशी मागणी आंदोलकांनी केली. सरदवाडी रस्त्यालगत तोडलेल्या झाडांच्या प्रकरणाची तसेच पंचवटी मोटेल्स येथे सुरू असलेली वृक्षतोड थांबवण्यात आलेल्या प्रकरणाचीही चौकशी व्हावी, असे निवेदनात म्हटले आहे. निवेदनाच्या प्रती जिल्हाधिकारी, उपविभागीय अधिकारी, वन विभाग नाशिक आणि तहसीलदार यांना पाठवण्यात आल्या आहेत. तालुकाध्यक्ष शरद शिंदे यांच्यासह पक्षाचे पदाधिकारी व कार्यकर्ते या आंदोलनात सहभागी झाले होते.
स्रोत: मूळ बातमी
Leave a Reply