नाशिकमध्ये येत्या शनिवारी, ३१ ऑक्टोबर रोजी सिंहस्थ ध्वजारोहण सोहळा पार पडणार आहे. या सोहळ्याला राष्ट्रपती द्रौपदी मुर्मू प्रमुख पाहुण्या म्हणून उपस्थित राहणार आहेत. सोहळ्यापूर्वी गोदावरी नदीच्या पाण्याबाबत चिंता व्यक्त होत होती. मात्र आता गंगापूर धरणातून पाणी सोडण्याचा निर्णय झाल्याने ध्वजारोहणाच्या दिवशी गोदामाई खळाळताना दिसणार आहे.
एकलहरे औष्णिक विद्युत केंद्र आणि त्याच्या आसपासच्या गावांसाठी गंगापूर धरणातून २५ दलघफु पाणी सोडले जाणार आहे. गुरुवारी मध्यरात्रीपासून प्रति सेकंद ३०० क्युसेक वेगाने हा विसर्ग सुरू करण्यात आला आहे. या पाण्यामुळे नदीला प्रवाह मिळणार असून ध्वजारोहण सोहळ्याच्या दिवशीही नदीत पाणी राहणार आहे.
पाण्याची मागणी का करण्यात आली
पंचवटीतील रामतीर्थ परिसरात ध्वजारोहण सोहळ्याची तयारी अंतिम टप्प्यात आली आहे. या कामांमुळे गेल्या काही दिवसांपासून रामतीर्थ आणि गांधी तलाव कोरडे ठेवण्यात आले होते. त्यामुळे आधीच असलेल्या पाणीटंचाईच्या पार्श्वभूमीवर सोहळ्याला पाणी कोठून येणार, असा प्रश्न उपस्थित झाला होता.
दुसरीकडे एकलहरे केंद्र, जवळपासची गावे आणि नांदूरमध्यमेश्वर अभयारण्यातील पक्ष्यांचा अधिवास यांचा विचार करून पाण्याची मागणी करण्यात येत होती. या मागणीच्या आधारेच गंगापूर धरणातून पाणी सोडण्याचा निर्णय घेण्यात आला.
पालकमंत्र्यांनी दिले स्पष्टीकरण
कोणत्याही धार्मिक सोहळ्यासाठी पाणी सोडण्याचे धोरण नाही, असे पालकमंत्री गिरीश महाजन यांनी स्पष्ट केले आहे. गंगापूर धरणातून सोडले जाणारे पाणी हे गावे, एकलहरे केंद्र आणि जनावरांचा विचार करून दिले जात आहे. या आवर्तनासाठी वारंवार मागणी होत होती, त्यामुळे त्याचा कुंभमेळ्याशी संबंध जोडू नये, असेही त्यांनी सांगितले. नाशिक शहरात सध्या पाणी कपात लागू केलेली नाही. नागरिकांनी पाण्याचा काटकसरीने वापर करावा, असे आवाहनही त्यांनी केले आहे.
स्रोत: मूळ बातमी
Leave a Reply