विधानपरिषदेच्या पाच जागांसाठी मतमोजणी अद्याप पूर्ण झालेली नाही. तब्बल २२ तासांपासून मतमोजणी सुरू असल्याने संपूर्ण राज्याचे लक्ष या निकालाकडे लागले आहे. या मतमोजणीत पुणे शिक्षक मतदारसंघातून एक धक्कादायक आकडेवारी समोर आली आहे. नेहमी आपल्या वक्तव्यांमुळे चर्चेत असणारे अभिजीत बिचुकले यांना या मतदारसंघात केवळ १९ मते मिळाली आहेत.
शिक्षक मतदारसंघात एकूण ३० उमेदवार निवडणुकीच्या रिंगणात होते. मतमोजणीदरम्यान १९ उमेदवार बाद झाले असून, त्यामध्ये बिचुकले यांचाही समावेश आहे. त्यामुळे बिचुकले यांचा या मतदारसंघातील प्रवास मतमोजणीच्या टप्प्यातच थांबला आहे.
शिक्षक मतदारसंघातील आकडेवारी
या मतदारसंघात कौस्तुभ गावडे यांना १७,६०० मते, सचिन सानप यांना ११,३२८ मते, तर दत्तात्रय सावंत यांना १०,३७७ मते मिळाली आहेत. जयंत आसगावकर यांना ८,३५० मते मिळाली आहेत. शिक्षक मतदारसंघासाठी विजयाचा कोटा २५,७५६ निश्चित करण्यात आला आहे. त्यामुळे अंतिम निकालासाठी आणखी प्रतीक्षा करावी लागणार आहे.
पदवीधर मतदारसंघाकडेही लक्ष
दरम्यान, अभिजीत बिचुकले यांनी पुणे शिक्षक मतदारसंघासोबतच पुणे पदवीधर मतदारसंघातूनही निवडणूक लढवली आहे. त्यामुळे शिक्षक मतदारसंघातून बाद झाल्यानंतर पदवीधर मतदारसंघात त्यांना किती मते मिळतात, याकडेही लक्ष लागले आहे. पुणे पदवीधर मतदारसंघात पहिल्या फेरीच्या आकडेवारीनुसार हर्षदा जाधव यांना १,१२,४०० मते, तर स्मित जाधव यांना १,०२,००० मते मिळाली आहेत. या मतदारसंघातील विजयाचा कोटा १,१३,११३ असून, हर्षदा जाधव यांना कोटा पूर्ण करण्यासाठी आणखी ७१६ मतांची गरज आहे. पाच जागांच्या निकालासाठी मतमोजणी सुरू असल्याने अंतिम निकाल जाहीर होण्यास आणखी वेळ लागण्याची शक्यता आहे.
स्रोत: मूळ बातमी
Leave a Reply