२०३० मध्ये संदीप विद्यापीठाचा विद्यार्थी उपग्रह अवकाशात जाणार

नाशिकच्या संदीप विद्यापीठात भारतीय अंतराळ संशोधन संस्थेच्या (इस्रो) ‘विक्रम साराभाई स्पेस एक्जीबिशन’ म्हणजेच ‘स्पेस ऑन व्हील्स’ या प्रदर्शनाचे आयोजन करण्यात आले आहे. या तीन दिवसीय प्रदर्शनाचे उद्घाटन गुरुवारी झाले. यावेळी झालेल्या पत्रकार परिषदेत विद्यापीठाचे अध्यक्ष डॉ. संदीप झा यांनी महत्त्वाची घोषणा केली. २०३० या वर्षापर्यंत विद्यार्थ्यांच्या नेतृत्वाखाली आणि इस्रोच्या सहकार्य व मार्गदर्शनातून उपग्रहाचे प्रक्षेपण करण्याचा प्रयत्न असेल, असे त्यांनी सांगितले.

उपग्रह कशासाठी उपयुक्त ठरणार

या उपग्रहाद्वारे कृषी, दळणवळण, जीपीएस, सायबर सुरक्षा, भूजल पातळी आणि भौगोलिक बदल यांची माहिती मिळण्यास मदत होणार आहे. विद्यापीठाच्या एरोनॉटिक्स आणि एरोस्पेस अभियांत्रिकी शाखांच्या प्रवेशाला चांगला प्रतिसाद मिळत असून विद्यार्थ्यांना प्रत्यक्ष कामाचा अनुभव मिळावा यासाठी विविध सामंजस्य करार केले जात आहेत. याचाच एक भाग म्हणून इस्रोसोबत सामंजस्य करार केला जाणार आहे. विद्यापीठ प्रांगणात आयोजित प्रदर्शन सर्व विद्यार्थ्यांसाठी शनिवार, ३१ ऑक्टोबरपर्यंत खुले असून अधिकाधिक शाळा आणि महाविद्यालयांतील विद्यार्थ्यांनी भेट देण्याचे आवाहन करण्यात आले आहे.

विद्यार्थ्यांमध्ये वैज्ञानिक कुतूहलाला चालना

प्रदर्शनाद्वारे विद्यार्थी, शिक्षक आणि नाशिकमधील नागरिकांना अंतराळ विज्ञान, उपग्रह तंत्रज्ञान, प्रक्षेपण याने आणि अंतराळ संशोधन क्षेत्रातील भारताच्या उल्लेखनीय कामगिरीबद्दल जाणून घेण्याची संधी मिळणार आहे. ‘स्पेस ऑन व्हील्स’ प्रदर्शनाचा मुख्य उद्देश भारताच्या अंतराळ कार्यक्रमातील यशाची माहिती सर्वसामान्यांपर्यंत पोहोचवणे हा आहे. या प्रदर्शनातून इस्रोचे उपग्रह उपयोजन, अंतराळ संशोधन, प्रक्षेपण यान तंत्रज्ञान आणि राष्ट्रीय विकासातील योगदान यांविषयी माहिती घेता येईल. विद्यार्थ्यांमधील वैज्ञानिक कुतूहलाला चालना देऊन त्यांना विज्ञान, तंत्रज्ञान, अभियांत्रिकी आणि संशोधन क्षेत्रांत करिअर घडवण्यासाठी प्रोत्साहन मिळेल, असा या उपक्रमामागील हेतू आहे. उद्घाटनप्रसंगी इस्रोचे शास्त्रज्ञ रवीकुमार वर्मा यांच्यासह मान्यवर उपस्थित होते.

स्रोत: मूळ बातमी