दिवाळीत मराठी चित्रपट नाही; ‘ब्लॅक फ्रायडे’ची चर्चा

दिवाळी म्हणजे घराघरांत आनंद, फराळाची रेलचेल, बाजारपेठांमधील गर्दी आणि सुट्ट्यांमुळे मनोरंजनाची मेजवानी. अशा काळात प्रेक्षकांना आकर्षित करण्यासाठी हिंदीसह मराठी सिनेसृष्टीतही नव्या चित्रपटांच्या प्रदर्शनाची चढाओढ असते. मात्र यंदा चित्र वेगळे आहे. दिवाळीच्या सुट्टीत एकही मराठी चित्रपट प्रदर्शित होणार नसल्याने हा शुक्रवार मराठीसाठी ‘ब्लॅक फ्रायडे’ ठरणार असल्याची चर्चा आहे.

‘रामायण’ची मोठी स्पर्धा

या दिवाळीत ‘रामायण’ हा मोठ्या बजेटचा आणि मोठ्या कलाकारांचा चित्रपट प्रदर्शित होत आहे. त्याची सध्या सर्वत्र जोरदार चर्चा आहे. दोन्ही भागांचा निर्मिती, प्रदर्शन आणि प्रसिद्धी असा एकूण खर्च सुमारे चार हजार कोटी रुपये असल्याचे सांगितले जाते. जगभरात सुमारे ५९ हजार पडद्यांवर प्रदर्शनाचे लक्ष्य ठेवण्यात आले आहे. त्यात भारतात सुमारे नऊ हजार, तर परदेशात ५० हजारांहून अधिक पडद्यांचा समावेश आहे. हा चित्रपट ५ नोव्हेंबरला हिंदी, तमिळ, तेलुगू, कन्नड, मल्याळम आणि इंग्रजी भाषांमध्ये जगभरातील चित्रपटगृहांत येणार आहे.

इतक्या मोठ्या प्रमाणावर प्रदर्शन होत असल्याने मराठी चित्रपटांना चित्रपटगृहे मिळणे कठीण झाले आहे. त्यामुळे कोणताही निर्माता किंवा दिग्दर्शक धोका पत्करण्यास तयार नसल्याचे दिसते. दिवाळीसारख्या मोठ्या सणाचा फायदा घेण्याऐवजी मराठी निर्मात्यांनी मैदान सोडल्याची टीकाही होत आहे.

सहा चित्रपटांना अपेक्षित प्रतिसाद नाही

२३ ऑक्टोबरला मराठीमध्ये तब्बल सहा चित्रपट प्रदर्शित झाले, पण त्यातील एकाही चित्रपटाला प्रेक्षकांचा म्हणावा तसा प्रतिसाद मिळाला नाही. यावर्षी ‘क्रांतिज्योती विद्यालय…मराठी माध्यम’ या चित्रपटापासून सुरू झालेली यशाची परंपरा ‘राजा शिवाजी’, ‘तुंबाडची मंजुळा’ आणि ‘देऊळ बंद २’ यांनी पुढे नेली होती. मात्र गेल्या दोन महिन्यांत एकाही मराठी चित्रपटाला प्रेक्षकांची म्हणावी तशी साथ मिळालेली नाही. त्यामुळे येणारे चित्रपट कशी कामगिरी करतात, याकडे मराठी सिनेसृष्टीचे लक्ष लागले आहे.

ज्येष्ठ अभिनेते महेश कोठारे यांनी या परिस्थितीवर मत व्यक्त करताना सांगितले की, दिवाळीत मराठी चित्रपट प्रदर्शित करण्यासाठी निर्माते, दिग्दर्शक आणि वितरकांनी आधीपासून नियोजन करायला हवे होते. त्यांनी स्वतः ‘धूमधडाका’, ‘दे दणादण’ आणि ‘धडाकेबाज’ यांसारखे चित्रपट दिवाळीत प्रदर्शित केले होते आणि त्यांना प्रेक्षकांचा चांगला प्रतिसाद मिळाला होता.

स्रोत: मूळ बातमी