‘कभी अलविदा ना कहना’ या चित्रपटातील ‘मितवा’ या गाण्याने जगभरात ओळख मिळवलेले गायक शफकत अमानत अली सध्या त्यांच्या आरोग्यामुळे चर्चेत आहेत. बऱ्याच काळापासून ते प्रसिद्धीपासून दूर होते आणि भारतातही दिसले नव्हते. नुकत्याच दिलेल्या एका मुलाखतीत त्यांनी आपल्या आजाराबाबत खुलासा केला आहे.
मुलाखतीत दिली आरोग्याची माहिती
गायकाने सांगितले की, त्यांना ‘मल्टिपल मायलोमा’ नावाचा रक्ताचा कर्करोग झाला आहे. या आजारामुळे त्यांना मोठ्या अडचणींचा सामना करावा लागला. वर्षभर त्यांच्यावर उपचार सुरू होते. बोन मॅरो बायोप्सीचे अहवाल आता क्लिअर आले असून, ही चांगली बातमी असल्याचे त्यांनी सांगितले. सध्या त्यांची प्रकृती खूप सुधारली असून, ते धोक्याबाहेर असल्याचेही त्यांनी स्पष्ट केले.
शफकत अमानत अली यांच्यावर अजूनही आठवड्यातून एकदा केमोथेरपी केली जाते. त्यानंतर त्यांच्यावर ऑटो ट्रान्सप्लांट शस्त्रक्रिया होणार आहे. या शस्त्रक्रियेनंतर ते पूर्णपणे बरे होतील, अशी अपेक्षा आहे.
संगीतात पुनरागमनाची तयारी
गायकाच्या म्हणण्यानुसार, या आजारपणामुळे ते संगीत क्षेत्रापासून दूर होते. मात्र आता ते परत येण्यासाठी तयार आहेत. त्यांचा एक कार्यक्रम २८ नोव्हेंबर २०२६ रोजी कराचीमध्ये होणार आहे. त्यानंतर लाहोर आणि इस्लामाबादमध्येही त्यांचे कार्यक्रम होणार आहेत.
यावेळी त्यांनी चाहत्यांना कर्करोगासारख्या आजारांबाबत जागरूक राहण्याचे आवाहन केले. शरीरात कुठेही वेदना होत असतील तर त्याकडे दुर्लक्ष करू नका, असे त्यांनी सांगितले. सुरुवातीच्या टप्प्यातच त्यांच्या आजाराचे निदान झाले होते, त्यामुळे वेळेवर उपचार करता आले, असेही गायकाने सांगितले.
Leave a Reply