वाशिम जिल्ह्यात दुष्काळसदृश परिस्थिती निर्माण झाली असून शेतकरी आणि सर्वसामान्य नागरिक पाण्यासाठी त्रस्त असताना, बुलडाणा जिल्ह्यातील पेनटाकळी प्रकल्पात मुबलक पाणीसाठा उपलब्ध असूनही वाशिम जिल्ह्याच्या हक्काचे पाणी सोडण्यास टाळाटाळ केली जात असल्याचा मुद्दा आता ऐरणीवर आला आहे. पैनगंगा नदीवरील पेनटाकळी प्रकल्पातून वाशिम जिल्ह्याच्या वाट्याचे ३.७२ दशलक्ष घनमीटर पाणी तातडीने सोडण्यात यावे, अशी आक्रमक मागणी शिवसेनेच्या अमरावती विभागीय संपर्कप्रमुख संजना गवळी यांनी केली आहे.
यासंदर्भात त्यांनी बुलडाणा येथील जलसंपदा विभागाच्या अधिकाऱ्यांना जाब विचारत प्रशासनाला धारेवर धरले. पाणी सोडण्याबाबत तातडीने निर्णय न घेतल्यास मोठे जनआंदोलन उभारण्याचा इशाराही त्यांनी दिला. पैनगंगा नदीच्या लाभक्षेत्रातील वाशिम जिल्ह्यातील ६४३ हेक्टर क्षेत्राला पेनटाकळी प्रकल्पातील पाण्याचा लाभ मिळणे अपेक्षित आहे. त्यासाठी ३.७२ दशलक्ष घनमीटर पाणी वाशिम जिल्ह्याच्या हिश्श्याचे निश्चित करण्यात आले आहे.
शेतकऱ्यांवर अन्याय असल्याचा आरोप
प्रकल्पात पाणीसाठा उपलब्ध असतानाही हे पाणी अद्याप सोडण्यात आले नसल्याने लाभक्षेत्रातील शेतकऱ्यांना पाण्यापासून वंचित रहावे लागत असल्याचा आरोप संजना गवळी यांनी केला. एका बाजूला प्रकल्पात पाणी उपलब्ध असताना दुसरीकडे वाशिम जिल्ह्यातील शेतकरी पाण्यासाठी प्रतीक्षा करीत आहेत. हा जिल्ह्यातील शेतकऱ्यांवर अन्याय असल्याची भूमिका त्यांनी मांडली. जिल्ह्यात सध्या पावसाअभावी दुष्काळी परिस्थिती निर्माण झाली असून, त्याचा थेट परिणाम शेती आणि पिण्याच्या पाण्याच्या उपलब्धतेवर होत आहे.
शेतकऱ्यांसमोर पिके वाचविण्याचे मोठे आव्हान निर्माण झाले आहे. पिकांना वेळेवर पाणी मिळाले नाही, तर उत्पादनात मोठी घट होण्याची भीती आहे. दुसरीकडे अनेक भागांत नागरिकांनाही पिण्याच्या पाण्यासाठी भटकंती करावी लागत आहे. अशा गंभीर परिस्थितीत पेनटाकळी प्रकल्पातील वाशिम जिल्ह्याच्या हक्काचे पाणी पैनगंगा नदीत सोडणे अत्यंत आवश्यक असल्याचे गवळी यांनी स्पष्ट केले.
सिंचनासह पिण्याच्या पाण्याचा प्रश्न
जलसंपदा विभागाच्या अधिकाऱ्यांशी चर्चा करताना त्यांनी पाण्याच्या नियोजनाबाबत प्रशासनाची भूमिका स्पष्ट करण्याची मागणी केली. वाशिम जिल्ह्याच्या वाट्याचे ३.७२ दशलक्ष घनमीटर पाणी उपलब्ध करून देण्यास विलंब का होत आहे, असा सवालही त्यांनी उपस्थित केला. शेतकऱ्यांच्या सिंचनाचा आणि नागरिकांच्या पिण्याच्या पाण्याचा प्रश्न लक्षात घेऊन तातडीने कार्यवाही करावी, अशी मागणी त्यांनी केली. वाशिम जिल्ह्याच्या हक्काच्या पाण्यासाठी आता केवळ आश्वासन नको, तर प्रत्यक्ष कार्यवाही अपेक्षित आहे. संबंधित विभागाने तातडीने पाणी सोडण्याचा निर्णय न घेतल्यास शेतकरी आणि नागरिकांना सोबत घेऊन तीव्र आंदोलन छेडण्यात येईल, असा इशारा देण्यात आला आहे.
Leave a Reply