पुण्यात एका कार्यक्रमानंतर पत्रकारांशी बोलताना काँग्रेस प्रदेशाध्यक्ष हर्षवर्धन सपकाळ यांनी निवडणूक आयोगाच्या कारभारावर, डिलिमिटेशन विधेयकावर आणि अजित पवार विमान अपघात प्रकरणावर भाष्य केले. निवडणूक प्रक्रिया आरोपीच्या कठड्यात उभी असून निवडणूक आयोगाची वकिली भलतेच लोक करत आहेत, अशी टीका त्यांनी केली.
निवडणूक आयोगावर हल्लाबोल
राजू शेट्टी यांनी निवडणूक आयुक्तांची भेट घेतल्याच्या मुद्द्यावर बोलताना सपकाळ म्हणाले की, तुम्ही एकटे गेलात आणि निवडणूक आयुक्तांनी भेट दिली, हे तुमचे नशीब; मात्र आम्ही ३०० खासदार घेऊन गेलो तरी निवडणूक आयुक्त भेटत नाहीत, अशी परिस्थिती आहे. निवडणूक आयोगाकडून उत्तरं मिळत नसल्याने नागरिकांमधील अस्वस्थता वाढत असल्याचेही त्यांनी नमूद केले.
‘इतके दिवस झोपले होते का?’ तटकरेंना सवाल
अजित पवार विमान अपघात प्रकरणावरून रोहित पवार हे अनेक दिवसांपासून प्रश्न उपस्थित करत आहेत. याच पार्श्वभूमीवर सुनील तटकरे यांनी पंतप्रधान नरेंद्र मोदी आणि केंद्रीय गृहमंत्री अमित शाह यांची भेट घेण्याची भूमिका मांडली होती. यावर प्रतिक्रिया देताना सपकाळ यांनी ‘इतके दिवस झोपले होते का,’ असा सवाल करत तटकरेंना खडेबोल सुनावले.
डिलिमिटेशन विधेयकाला विरोध
डिलिमिटेशन विधेयकावर बोलताना भाजपला मतदारसंघ पुनर्रचनेच्या माध्यमातून देशात जातीय दंगली घडवायच्या आहेत, असा आरोप सपकाळ यांनी केला. इंडिया आघाडीतील पक्ष या विधेयकाला विरोध करत असून, याबाबत आघाडीच्या पातळीवर चर्चा होईल, असेही त्यांनी स्पष्ट केले.
रोहित पवार काँग्रेसमध्ये प्रवेश करणार का, या प्रश्नावर सपकाळ यांनी सावध भूमिका घेतली. राष्ट्रवादी काँग्रेस हा आमचा मित्रपक्ष आहे. त्यांच्या पक्षातील अंतर्गत विषयांवर भाष्य करणे योग्य नाही, असे सांगत त्यांनी या चर्चेवर अधिक बोलणे टाळले. सपकाळ यांच्या या वक्तव्यामुळे महाराष्ट्रातील निवडणूक राजकारण आणि विरोधकांच्या भूमिकेवर पुन्हा चर्चा सुरू झाली आहे.
Leave a Reply