राज्याच्या राजकारणात सतत काहीतरी घडत असते. आरोप-प्रत्यारोपांच्या फैरी झडत असतात. सध्या मतदारसंघ पुनर्रचना विधेयक आणि दोन्ही राष्ट्रवादींच्या विलीनीकरणाचा मुद्दा चर्चेच्या केंद्रस्थानी आहे. शिंदे गटाचे खासदार नरेश म्हस्के यांनी सुप्रिया सुळे केंद्रात मंत्री झाल्या तर आम्ही त्यांचे स्वागत करू, असे विधान केल्याने वेगवेगळ्या चर्चा सुरू झाल्या आहेत. याच पार्श्वभूमीवर काँग्रेसचे प्रदेशाध्यक्ष हर्षवर्धन सपकाळ यांनी महत्त्वाचे विधान केले आहे.
सपकाळ काय म्हणाले
हर्षवर्धन सपकाळ पुणे दौऱ्यावर असताना त्यांनी पत्रकारांशी संवाद साधला. शरद पवार यांचा पक्ष एनडीएसोबत जाऊ शकतो आणि मतदारसंघ पुनर्रचना विधेयकालाही पाठिंबा देऊ शकतो, असा दावा केला जातो. यावर बोलताना सपकाळ यांनी सांगितले की, देशात ५० टक्के आरक्षण काँग्रेसनेच आणले. २०२९ सालापासून महिला आरक्षण विधेयक लागू करण्याची काँग्रेसची मागणी आहे. मात्र आरक्षणाच्या नावाखाली मतदारसंघ पुनर्रचना विधेयक आणण्याचा भाजपचा डाव आहे, असे त्यांनी म्हटले. इंडिया आघाडीतील सगळे पक्ष या विधेयकाला विरोध करणार आहेत, असा विश्वास त्यांनी व्यक्त केला. भाजपची पाठराखण करताना मित्रपक्षांनी विचार करावा, असा सल्लाही त्यांनी दिला. आम्ही भाजपसोबत जाणार नाही, असे सुप्रिया सुळे यांनी याआधी सांगितले आहे, असेही सपकाळ यांनी नमूद केले.
२०२९ च्या निवडणुकीआधी मोठे पक्षप्रवेश?
येणाऱ्या २०२९ साली लोकसभा तसेच विधानसभेची निवडणूक होणार आहे. या निवडणुकीला लक्षात घेऊन अनेक नेतेमंडळी सोईच्या पक्षात जाऊ शकतात. यावर बोलताना सपकाळ यांनी दावा केला की, येणाऱ्या काळात काँग्रेसमध्ये मोठे पक्षप्रवेश होतील. मोठी वेटिंग लिस्ट असल्याचे त्यांनी सांगितले. कोणाला पक्षात घ्यायचे हे आम्ही ठरवू, असेही ते म्हणाले. हा पक्षप्रवेश नेमका कोणाचा असेल आणि कोणता नेता काँग्रेसमध्ये जाणार, यावर राजकीय वर्तुळात चर्चा रंगली आहे.
Leave a Reply