येत्या हिवाळी अधिवेशनात मतदारसंघ पुनर्रचना विधेयकाला पाठिंबा मिळावा यासाठी खासदारांना १५० कोटी रुपयांचा भाव ठरल्याचा दावा खासदार संजय राऊत यांनी केला होता. ही ऑफर सर्व पक्षांसाठी असल्याचेही ते म्हणाले होते. आज त्यांनी पुन्हा एकदा आपली भूमिका मांडत भाजपवर निशाणा साधला. माझा आकडा खरा आहे, कोणी त्यावर आक्षेप घेतलाय का, असा खडा सवाल त्यांनी केला.
## दीडशे कोटींचा दर
गेल्या काही महिन्यांत केंद्रीय गृहमंत्री अमित शाह महाराष्ट्रात सात वेळा आले, असे राऊत म्हणाले. मणिपूरमध्ये काय चाललंय ते बघा, इतर राज्यांत जा, असेही ते म्हणाले. मी जे म्हणालो त्यावर कोणी आक्षेप घेतला आहे का, सांगा ना, मी त्याला उत्तर देतो, असे त्यांनी म्हटले. मी कुणावरही व्यक्तिगत टिप्पणी करणार नाही, असेही त्यांनी स्पष्ट केले.
अद्याप संसदेचं हिवाळी अधिवेशन घेतलं जात नाही. हे संविधानाच्या विरोधात आणि नियमबाह्य आहे, असा आरोप राऊत यांनी केला. तुम्ही एक अधिवेशन गुंडाळत आहात, इतकी तुमची हिम्मत होते, असे ते म्हणाले. त्यांच्या मते, अधिवेशन घेतलं तर डिलिमिटेशन संदर्भातील विधेयक आणून ते मंजूर करू आणि पडेल ती किंमत देऊ, असा भाजपचा विचार आहे. मग खासदार विकत घेऊ, पक्ष फोडू, संसद बंद पाडू, असा आरोप त्यांनी केला.
जेव्हा पक्ष फुटत नाहीत, तेव्हा काय, असा प्रश्नही त्यांनी उपस्थित केला. द्रमुक असेल, शरद पवार यांच्या नेतृत्वातील राष्ट्रवादी असेल, इतरही काही पक्ष आहेत, असे ते म्हणाले. आमच्यावरही प्रयोग झाला. आमचे सहा लोक फोडले, असा दावा त्यांनी केला. अमित शाह अथवा भाजपकडून जे एजंट नेमले आहेत, त्यांच्याकडून आकडा पूर्ण करण्यासाठी जी रक्कम लागते, ती दिली जाते, असा आरोप त्यांनी केला. या क्षणी भाजपच्या राष्ट्रीय पातळीवर खासदारांचा दीडशे कोटींचा भाव सुरू आहे, असे ते म्हणाले. डिलिमिटेशनच्या बाजूने मतदान करण्यासाठी हा भाव सुरू आहे, हे मी सत्य सांगत आहे, असे राऊत म्हणाले.
## ऑल पार्टी ऑफर
आम्ही पैसे देत नाहीत, मग महाराष्ट्रातील खासदार काय चिंचोके देऊन फुटले का, असा सवाल त्यांनी केला. का खणानाराळानं त्यांची ओटी भरली म्हणून फुटले, असेही ते म्हणाले. त्यांनाही ५०-५० कोटी, १००-१०० कोटी दिले, तेव्हाच ते फुटले ना, असा दावा त्यांनी केला. हे तर महत्त्वाचं विधेयक आहे. २०२९ च्या निवडणुकीत भाजपच्या अस्तित्वाचा प्रश्न आहे. त्यामुळे दीडशे कोटी रुपये घ्यायचे आणि आम्हाला मतदान करायचं, अशी सर्व पक्षांसाठी ऑफर आहे, असा दावा त्यांनी केला.
## टिपू सुलतानवरून सरकारला जाब
टिपू सुलतान जयंतीवरून सुरू असलेल्या वादावरही राऊत यांनी सरकारला जाब विचारला. टिपू सुलतानविषयी सरकारची अधिकृत भूमिका काय आहे, हे एकदा सरकारने जाहीर केलं पाहिजे, असे ते म्हणाले. टिपू सुलतान हा इंग्रजांविरोधातील लढाईत मारला गेला. त्याच्यामुळे फार मोठा वर्ग आहे जो त्याला हिरो मानतो, असे राऊत म्हणाले.
याच्यामध्ये जर हिंदू-मुसलमान असा भाग करायचा असेल तर कुणी आडवलं नाही, पण एकदा केंद्र आणि राज्य सरकारतर्फे ठरवायला हवे की, टिपू सुलतान नक्की कोण आहे, असे ते म्हणाले. त्याच्या मदतीसाठी महाराष्ट्रातूनही इंग्रजांविरोधात लढण्यासाठी सैन्य गेलं होतं. त्याकाळात जे काही सरदार होते, ते सुद्धा टिपूच्या मदतीसाठी ब्रिटिशांविरोधातील लढाईत त्याच्यासोबत लढाईत होते. बहुधा ते सांगलीचे पटवर्धन सरदार होते, आता मला असे आठवत आहे, असे राऊत म्हणाले.
पण हा वाद किती वर्ष चालणार आहे, असा प्रश्न त्यांनी उपस्थित केला. केंद्र सरकारने त्यावर पडदा टाकला पाहिजे. टिपू कोण आहे, इंग्रजांविरोधात लढताना मरण पावलेला वीर आहे की या राष्ट्राचा शत्रू आहे, हे जोपर्यंत सरकार जाहीर करत नाही तोपर्यंत हा वाद कायम राहिल, असे ते म्हणाले. सध्याच्या या सरकारला हा वाद हवा आहे, असा आरोप त्यांनी केला. या देशात असंख्य प्रश्न आहेत. महाराष्ट्रात प्रश्न आहेत. टिपू टिपू किती काळ खेळायचं, थांबवा हा विषय, असे आवाहन त्यांनी केले.
Leave a Reply