भंडारा जिल्ह्यातील तुमसर तालुक्यातील वाहनी गावात कर्जवसुलीच्या नावाखाली घडलेला एक प्रकार संतापजनक ठरला आहे. कर्जाचे हप्ते थकल्याच्या कारणावरून खासगी फायनान्स कंपनीच्या प्रतिनिधींनी एका शेतकरी कुटुंबाला घराबाहेर काढून घराला कुलूप ठोकले. कुटुंबातील कर्त्या मुलाच्या निधनाने आणि दुष्काळी परिस्थितीमुळे आधीच आर्थिक संकटात असलेल्या या कुटुंबाचे संसारोपयोगी साहित्यही घराबाहेर काढण्यात आले.
शुक्रवारी सायंकाळी घडला प्रकार
विष्णू कनपटे यांनी घर बांधण्यासाठी २०२३ मध्ये खासगी फायनान्स कंपनीकडून कर्ज घेतले होते. सुरुवातीचे काही हप्ते नियमित भरले जात होते. मात्र, तीन ते चार महिन्यांपूर्वी कुटुंबातील कर्त्या मुलाचे निधन झाले. त्यातच जिल्ह्यातील दुष्काळी परिस्थितीमुळे आर्थिक अडचणी वाढल्या आणि कर्जाचे हप्ते थकले. शुक्रवारी सायंकाळच्या सुमारास कंपनीचे प्रतिनिधी थेट घरी पोहोचले. त्यांनी कुटुंबाला घराबाहेर काढत घराला कुलूप लावले. घरातील संसारोपयोगी साहित्यही बाहेर काढण्यात आले. कुटुंबात लहान नातवंडे आणि वृद्ध सदस्य असताना थंडीच्या दिवसांत त्यांच्यावर बेघर होण्याची वेळ आली.
ग्रामस्थांच्या हस्तक्षेपानंतर कुटुंबाला दिलासा
घटनेची माहिती मिळताच स्थानिक नागरिक आणि लोकप्रतिनिधींनी घटनास्थळी धाव घेतली. त्यांनी कंपनीच्या प्रतिनिधींना जाब विचारत या कारवाईचा निषेध केला. कर्जाची रक्कम भरणे शक्य न झाल्यास गावातून लोकवर्गणी करून ती उभी करू, मात्र कुटुंबाला घराबाहेर काढू नका, अशी भूमिका ग्रामस्थांनी घेतली. त्यांच्या हस्तक्षेपानंतर अखेर घराचे कुलूप काढण्यात आले आणि कुटुंबाला पुन्हा घरात राहण्यास देण्यात आले.
दरम्यान, कंपनीच्या कर्मचाऱ्यांनी दोन दिवसांची मुदत मागितली होती; मात्र ती नाकारण्यात आली. कोणतीही पूर्वसूचना न देता घरातील साहित्य बाहेर काढण्यास भाग पाडल्याची व्यथा कुटुंबातील सदस्याने मांडली. दुष्काळग्रस्त परिस्थितीत शेतकऱ्यांकडून सक्तीने कर्जवसुली करू नये, अशा शासनाच्या सूचना असतानाही कंपनीच्या प्रतिनिधींनी अशी कारवाई केल्याचा आरोप होत आहे.
Leave a Reply