उत्तर प्रदेशातील सहारनपूरमध्ये शनिवारी सर्किट हाऊसमध्ये एक वेगळाच प्रकार घडला. सर्वोच्च न्यायालयाच्या न्यायमूर्तींच्या स्वागतासाठी तयार असलेल्या पोलिसांनी चुकून एमआयएमचे अध्यक्ष असदुद्दीन ओवेसी यांना गार्ड ऑफ ऑनर दिला. या घटनेचा व्हिडीओ समोर आला असून तो सोशल मीडियावर व्हायरल झाला आहे.
न्यायमूर्तींच्या स्वागताची तयारी, सलामी मिळाली ओवेसींना
पोलिसांना माहिती मिळाली होती की सर्वोच्च न्यायालयाचे एक न्यायमूर्ती सर्किट हाऊसला येणार आहेत. त्यांच्या स्वागतासाठी गार्ड ऑफ ऑनरची तयारी करण्यात आली होती आणि जवान तैनात करण्यात आले होते. पण न्यायमूर्ती येण्याआधीच ओवेसी तिथे पोहोचले आणि पोलिसांना तेच न्यायमूर्ती असल्याचा समज झाला. त्यांनी लगेच ओवेसींना मानवंदना दिली आणि ओवेसी यांनी उभे राहून ती स्वीकारली.
पत्रकार परिषद रद्द, पोलिसांकडून अद्याप स्पष्टीकरण नाही
शनिवारी सकाळी अकराच्या सुमारास आझाद समाज पक्षाचे प्रमुख चंद्रशेखर सर्किट हाऊसला पोहोचले होते आणि एका खोलीत बसले होते. त्यानंतर वीस मिनिटांनी ओवेसी तिथे आले. त्यांच्यासोबत त्यांचे सुरक्षा कर्मचारी होते. सर्किट हाऊसमध्ये ओवेसी आणि चंद्रशेखर यांची पत्रकार परिषद होणार होती, पण ती अचानक रद्द करण्यात आली. त्यानंतर दोन्ही नेते तिथून निघून जिल्हाधिकारी कार्यालयात गेले.
पोलिसांना आपली चूक नेमकी कधी लक्षात आली, हे अद्याप कळलेले नाही. या प्रकरणी पोलिसांनी अद्याप कोणतेही स्पष्टीकरण दिलेले नाही आणि सलामी देणाऱ्या पोलिसांवर कारवाई होणार का, याबाबतही माहिती दिलेली नाही.
Leave a Reply