देशातील सर्वात मोठ्या दानशूरांची नवी यादी समोर आली आहे. या यादीत एचसीएलचे संस्थापक शिव नाडर आणि त्यांचे कुटुंब सलग पाचव्यांदा पहिल्या क्रमांकावर राहिले आहेत. आर्थिक वर्ष २०२५-२६ मध्ये नाडर कुटुंबाने सामाजिक कामांसाठी २,५९३ कोटी रुपये दिले. म्हणजेच दररोज सरासरी ७.१ कोटी रुपयांचे दान त्यांच्याकडून करण्यात आले.
गेल्या वर्षाच्या तुलनेत नाडर यांच्या दानात चार टक्क्यांची घट झाली असली, तरी त्यांचे पहिले स्थान कायम राहिले आहे. त्यांच्या एकूण योगदानातील ९३ टक्के रक्कम त्यांच्या वैयक्तिक संपत्तीतून आली आहे. कला, संस्कृती आणि वारसा जतन करण्यासाठी त्यांनी सर्वाधिक १,२२० कोटी रुपये दिले आहेत.
अदानी आणि अंबानीही यादीत
या यादीत दुसऱ्या क्रमांकावर गौतम अदानी आणि त्यांचे कुटुंब आहे. त्यांनी यंदा ८७७ कोटी रुपयांचे दान दिले असून, त्यांच्या दानात जवळपास १२७ टक्क्यांची वाढ झाली आहे. तिसऱ्या क्रमांकावर बजाज कुटुंब आहे. त्यांच्या दानात ४२ टक्के वाढ झाली असून, त्यांनी ६३२ कोटी रुपये दिले आहेत.
रिलायन्स इंडस्ट्रीजचे प्रमुख मुकेश अंबानी चौथ्या क्रमांकावर आहेत. त्यांनी ६२० कोटी रुपयांचे दान दिले असून, त्यांच्या दानात एक टक्क्याची घट झाली आहे. लसनिर्मितीनंतर चर्चेत आलेले सायरस पुनावाला आणि अदार पुनावाला यांनी ३३६ कोटी रुपये, तर सुधीर मेहता आणि समीर मेहता यांनी ३३४ कोटी रुपयांचे योगदान दिले आहे.
यादीत एकूण २१९ दानशूर
या यादीत एकूण २१९ दानशूरांचा समावेश आहे. या सर्वांनी मिळून आर्थिक वर्ष २०२६ मध्ये ११,५५४ कोटी रुपये दान केले आहेत. ही रक्कम गेल्या वर्षापेक्षा ११ टक्क्यांनी अधिक आहे. पहिल्या दहा दानदात्यांचा वाटा ६,५७२ कोटी रुपये इतका आहे.
या यादीतील एक लक्षवेधी बाब म्हणजे देशातील दहा सर्वात श्रीमंत व्यक्तींपैकी केवळ चार जणांचाच दानशूरांच्या यादीत समावेश आहे. महिला दानकर्त्यांची संख्या २४ वरून २९ पर्यंत वाढली आहे. रोहिणी नीलेकणी यांनी २१५ कोटी रुपयांचे दान करत सर्वाधिक दान करणाऱ्या महिलांमध्ये पहिला क्रमांक मिळवला आहे.
Leave a Reply