कार्तिकी यात्रेच्या पार्श्वभूमीवर पंढरपूरमध्ये भक्तीसोबत पर्यावरण रक्षणाचाही जागर सुरू झाला आहे. विठ्ठलाच्या दर्शनासाठी लाखो वारकरी पंढरीकडे येत असताना यंदाच्या यात्रेत स्वच्छ पंढरपूर, सुंदर पंढरपूर आणि प्लास्टिकमुक्त वारी असा संदेश देण्यासाठी महाराष्ट्र प्रदूषण नियंत्रण मंडळाने विशेष जनजागृती मोहीम हाती घेतली आहे. या मोहिमेअंतर्गत तयार करण्यात आलेल्या पर्यावरण जनजागृती प्रचार बसचे उद्घाटन उपमुख्यमंत्री एकनाथ शिंदे यांच्या हस्ते करण्यात आले.
मंडळाच्या अध्यक्षांच्या संकल्पनेतून उपक्रम
महाराष्ट्र प्रदूषण नियंत्रण मंडळाचे अध्यक्ष सिद्धेश कदम यांच्या संकल्पनेतून हा उपक्रम राबविण्यात येत आहे. या विशेष बसच्या माध्यमातून राज्यभरातील नागरिकांपर्यंत वसुंधरा संरक्षण, पर्यावरण संवर्धन आणि स्वच्छतेचा संदेश पोहोचविण्यात येणार आहे. एकल वापराच्या प्लास्टिकचा वापर टाळा, कापडी पिशव्यांचा वापर करा आणि निसर्ग वाचवा, अशा संदेशांद्वारे नागरिकांना पर्यावरणपूरक जीवनशैली स्वीकारण्याचे आवाहन केले जाणार आहे.
कार्तिकी यात्रेत लाखो भाविक दाखल होत असल्याने प्लास्टिक कचरा, नदीपात्रातील अस्वच्छता आणि यात्रा परिसरातील प्रदूषण रोखणे हे मोठे आव्हान असते. याच पार्श्वभूमीवर मंडळाने जनजागृतीसाठी पारंपरिक लोककलेचा आधार घेतला आहे. कीर्तन, भारूड आणि पोवाड्यांच्या माध्यमातून वारकरी व भाविकांना स्वच्छतेचे महत्त्व पटवून दिले जात आहे. भक्तीच्या सुरांतून पर्यावरण रक्षणाचा विचार रुजविण्याचा हा प्रयत्न आहे.
स्वच्छतेचा संदेश राज्यभर पोहोचविण्याचा प्रयत्न
प्लास्टिकच्या पिशव्यांऐवजी कापडी पिशव्यांचा वापर करावा, कचरा उघड्यावर टाकू नये, चंद्रभागा नदीचे पात्र स्वच्छ ठेवावे आणि यात्रा परिसरात स्वच्छतेचे नियम पाळावेत, असा या मोहिमेचा संदेश आहे. पंढरीतून सुरू झालेला हा पर्यावरणाचा जागर राज्यभर पोहोचविण्याचा मंडळाचा प्रयत्न आहे.
या कार्यक्रमाला रोजगार हमी मंत्री भरत गोगावले, मंडळाचे अध्यक्ष सिद्धेश कदम, आमदार राजू खरे, आमदार अभिजीत पाटील, नगराध्यक्षा डॉ. प्रणिता भालके, संजय भुसकुटे, माजी आमदार शहाजी पाटील, प्रांताधिकारी सचिन इथापे आणि तहसीलदार सचिन लंगुटे आदी उपस्थित होते.
Leave a Reply