सणासुदीच्या काळात घरी फराळ आणि मिठाई मोठ्या प्रमाणावर आणली जाते. चकली, चिवडा, करंजी, लाडू आणि शंकरपाळे यांसारखे पारंपरिक पदार्थ आवडीने खाल्ले जातात. मात्र सतत तेलकट आणि तिखट पदार्थ खाल्ल्याने पचन बिघडू शकते. व्यायामाकडे दुर्लक्ष झाले तर वजन वाढते आणि पोट फुगणे, गॅस, अॅसिडिटी, बद्धकोष्ठता तसेच दिवसभर सुस्ती जाणवू लागते.
अशा वेळी शरीरातील टाकाऊ घटक बाहेर काढण्यासाठी काही साधे घरगुती उपाय उपयुक्त ठरू शकतात. मात्र हे उपाय केवळ सामान्य माहिती म्हणून दिले जात आहेत; कोणताही उपाय करण्यापूर्वी डॉक्टरांचा सल्ला घेणे महत्त्वाचे आहे.
दिवसाची सुरुवात कोमट पाण्याने
सकाळी उठल्यानंतर एक ग्लास कोमट पाणी प्यावे. कोमट पाण्यामुळे शरीरातील टाकाऊ घटक बाहेर पडण्यास मदत होते आणि शरीराचे संतुलन टिकून राहते. द्रवपदार्थांचे संतुलन राखण्यासाठी, पचन सुरळीत ठेवण्यासाठी तसेच मूत्रपिंडाच्या कार्यासाठी कोमट पाणी फायदेशीर मानले जाते. सणांच्या दिवसांत अनेकजण पाणी पिणेच विसरतात, त्यामुळे पाण्याचे प्रमाण कमी होऊ नये याकडे लक्ष द्यावे.
फायबरयुक्त आहार आणि नारळ पाणी
रोजच्या आहारात फायबर असलेल्या पदार्थांचा समावेश करावा. पपई, सफरचंद, पेरू यांसारखी फळे, ओट्स, दलिया, हिरव्या पालेभाज्या आणि ताज्या कोशिंबिरीमुळे अन्नाचे पचन सोपे होते. फायबरमुळे आतड्यांची हालचाल सक्रिय राहते आणि मलविसर्जन नियमित होण्यास मदत होते. याशिवाय शरीर ताजेतवाने ठेवण्यासाठी साखर न घालता तयार केलेले लिंबू पाणी आणि नारळ पाणी प्यावे. नारळ पाण्यातील पोटॅशियमसारखे इलेक्ट्रोलाइट्स शरीराचे संतुलन राखण्यास मदत करतात, तर लिंबातील व्हिटॅमिन सी त्वचेसाठी फायदेशीर मानले जाते.
वारंवार डिटॉक्स पेये किंवा सप्लिमेंट्स घेणे मात्र टाळावे, कारण त्यामुळे मूत्रपिंड आणि यकृताच्या आरोग्यावर गंभीर परिणाम होऊ शकतात. तसेच मैदा आतड्यांना चिकटतो, हा एक गैरसमज आहे; पचनसंस्था अन्नाचे पचन करून टाकाऊ पदार्थ नैसर्गिकरीत्या बाहेर टाकते. शरीरातील टाकाऊ पदार्थ बाहेर काढण्याचे काम यकृत आणि मूत्रपिंड नैसर्गिकरीत्या करतात, त्यामुळे संतुलित आहार आणि पुरेसे पाणी हेच खरे उपाय आहेत.
Leave a Reply