कामोठे गाव परिसरातील अंतर्गत गल्ल्यांमध्ये साचलेला कचरा आणि तुंबलेल्या सांडपाण्यामुळे निर्माण झालेल्या अस्वच्छतेची प्रशासनाने अखेर दखल घेतली आहे. ठाकरे गटाच्या नगरसेविका प्रिया गोवारी आणि युवा नेतृत्व सुनील (भाऊ) गोवारी यांच्या सातत्यपूर्ण पाठपुराव्यानंतर बुधवारी संबंधित परिसरात स्वच्छतेच्या कामाला प्रत्यक्ष सुरुवात करण्यात आली. त्यामुळे अनेक दिवसांपासून त्रस्त असलेल्या स्थानिक रहिवाशांना दिलासा मिळण्याची अपेक्षा आहे.
दुर्गंधी आणि डासांचा त्रास
कामोठे गावातील अंतर्गत गल्ल्यांमध्ये कचरा साचल्याने आणि सांडपाण्याचा योग्य निचरा होत नसल्याने परिसरात दुर्गंधी पसरली होती. तसेच डासांचा प्रादुर्भाव वाढल्याने नागरिकांच्या आरोग्याचा प्रश्न निर्माण झाला होता. या अस्वच्छतेमुळे रहिवाशांना दैनंदिन वावरताना त्रास सहन करावा लागत होता.
पाठपुराव्यानंतर कामाला सुरुवात
या समस्येची गांभीर्याने दखल घेत प्रिया गोवारी आणि सुनील गोवारी यांनी संबंधित प्रशासनाकडे स्वच्छता करण्यासह सांडपाण्याचा निचरा सुरळीत करण्याची मागणी केली होती. त्यासाठी त्यांनी सातत्याने पाठपुरावा केला. अखेर प्रशासनाने संबंधित ठिकाणी स्वच्छतेचे काम हाती घेतले आहे. या वेळी शिवसैनिक जयेश जनार्दन गोवारी उपस्थित होते. नागरिकांच्या समस्या केवळ मांडून न थांबता, त्या सोडविण्यासाठी सातत्याने पाठपुरावा करून प्रत्यक्ष काम सुरू होईपर्यंत प्रयत्नशील राहणे, हीच जनसेवेची बांधिलकी असल्याचे नगरसेविका प्रिया सुनील गोवारी यांनी सांगितले. स्वच्छतेचे काम पूर्ण झाल्यानंतर परिसरातील अस्वच्छतेचा प्रश्न कितपत सुटतो, याकडे नागरिकांचे लक्ष लागले आहे.
Leave a Reply