मुंबईत येत्या मंगळवारी, २४ नोव्हेंबर रोजी, राज्यस्तरीय बुवाबाजीविरोधी महिला परिषद होणार आहे. महाराष्ट्र अंधश्रद्धा निर्मूलन समिती आणि यशवंतराव चव्हाण सेंटर यांच्या संयुक्त विद्यमाने ही परिषद मुंबईतील यशवंतराव चव्हाण सेंटर येथे सकाळी दहा ते सायंकाळी पाच या वेळेत पार पडेल. अंधश्रद्धा आणि बुवाबाजीविरोधात महिलांमध्ये जागृती निर्माण करणे, तसेच या प्रश्नावर सखोल चर्चा घडवून आणणे, हा या परिषदेचा मुख्य उद्देश आहे.
उद्घाटन आणि प्रमुख सत्रे
परिषदेचे उद्घाटन खासदार सुप्रिया सुळे यांच्या हस्ते होणार असून, अभिनेत्री सोनाली कुलकर्णी प्रमुख उपस्थितीत सहभागी होणार आहेत. समितीचे राज्य कार्याध्यक्ष संजय बनसोडे अध्यक्षस्थानी असतील. दुसऱ्या सत्रात ज्येष्ठ मानसोपचारतज्ज्ञ डॉ. अनिल डोंगरे ‘बुवाबाजी : बळी स्त्रियांचा, एक मानसशास्त्रीय विश्लेषण’ या विषयावर मार्गदर्शन करतील. तिसऱ्या सत्रात ‘जेन-झी टॉक ऑन बुवाबाजी’ या परिसंवादात प्रियांका खेडेकर, हरी आवळे, शीतल वसावे आणि गौरी जाधव हे तरुण कार्यकर्ते सहभागी होतील. समारोपाच्या सत्राला ज्येष्ठ साहित्यिका प्रा. नीरजा, अभिनेत्री अनिता दाते आणि समितीचे राज्याध्यक्ष माधव बावगे उपस्थित राहणार आहेत.
राज्यभरातून ५०० हून अधिक प्रतिनिधी
गेल्या ३७ वर्षांपासून कार्यरत असलेल्या समितीने जादूटोणाविरोधी कायद्यांतर्गत आतापर्यंत एक हजार ५०० हून अधिक गुन्हे दाखल करून अनेक भोंदूबाबांचे पितळ उघडे पाडले आहे. या परिषदेसाठी राज्यभरातून ५०० हून अधिक प्रतिनिधी उपस्थित राहणार असून, नाशिक जिल्ह्यातूनही मोठ्या संख्येने कार्यकर्ते सहभागी होणार असल्याचे जिल्हा कार्याध्यक्ष प्रा. आशा लांडगे आणि प्रधान सचिव नितीन बागूल यांनी सांगितले. परिषदेच्या यशस्वितेसाठी ॲड. रंजना गवांदे, गायत्री आडे, विजय परब, आरती नाईक, विष्णू लोणारे आदी कार्यकर्ते परिश्रम घेत आहेत.
Leave a Reply