कर्जत आणि कसारा मार्गावर धावणाऱ्या लोकल गाड्यांमधील गर्दीचा प्रश्न दिवसेंदिवस गंभीर होत चालला आहे. सकाळी कामावर जाण्यासाठी आणि संध्याकाळी घरी परतण्यासाठी प्रवास करणाऱ्या हजारो प्रवाशांना गर्दीच्या डब्यांमध्ये जीव धोक्यात घालून प्रवास करावा लागत आहे. गर्दीच्या वेळेत लोकलच्या फेऱ्या वाढवाव्यात, अशी मागणी प्रवाशांकडून सातत्याने केली जात आहे.
ऑक्टोबरपासून मागणी, तरीही ठोस प्रतिसाद नाही
कल्याण-कर्जत-कसारा रेल्वे प्रवासी संघटनेने ६ ऑक्टोबर रोजी मुंबईच्या विभागीय रेल्वे व्यवस्थापकांकडे सविस्तर निवेदन सादर केले होते. गर्दीच्या वेळेत लोकलच्या फेऱ्या वाढवण्याची मागणी या निवेदनात करण्यात आली होती. त्यावर सकारात्मक निर्णय न झाल्यास १ डिसेंबर रोजी जनआंदोलन करण्याचा इशाराही संघटनेने दिला होता. मात्र महिना उलटून गेल्यानंतरही रेल्वे प्रशासनाकडून ठोस प्रतिसाद मिळाला नाही. त्यामुळे संघटनेचे अध्यक्ष राजेश घनघाव यांनी पुन्हा विभागीय रेल्वे व्यवस्थापकांना संदेश पाठवून रेल रोको आंदोलनाचा इशारा दिला. मागण्यांकडे दुर्लक्ष केल्यास निर्माण होणाऱ्या परिस्थितीला रेल्वे प्रशासन जबाबदार राहील, असेही त्यांनी स्पष्ट केले. या निवेदनाची प्रत लोहमार्ग पोलिस आयुक्त राकेश कलासागर आणि रेल्वे सुरक्षा दलाचे आयुक्त राहुल राज यांनाही पाठवण्यात आली होती.
या पार्श्वभूमीवर रेल्वे सुरक्षा दल आणि लोहमार्ग पोलिसांच्या वरिष्ठ अधिकाऱ्यांनी संघटनेच्या अध्यक्षांशी संपर्क साधून चर्चा केली. प्रवाशांच्या सुरक्षिततेला गर्दीमुळे निर्माण होणारा धोका आणि संभाव्य आंदोलन टाळण्यासाठी करावयाच्या उपाययोजनांबाबत या चर्चेत विचारविनिमय करण्यात आला.
लेखी आश्वासनाशिवाय माघार नाही
रेल्वे प्रशासनाने चर्चेसाठी बोलावल्यास संघटना तयार असल्याचे संघटनेने सांगितले आहे. मात्र केवळ तोंडी आश्वासनाने प्रश्न सुटणार नाही, अशी ठाम भूमिका संघटनेने घेतली आहे. लोकलच्या फेऱ्या वाढवण्याबाबत लेखी आश्वासन देऊन ठरलेल्या मुदतीत कार्यवाही करावी, अशी मागणी संघटनेने केली आहे. तसे न झाल्यास १ डिसेंबर रोजी जनआंदोलन करण्याचा निर्धार संघटनेने व्यक्त केला आहे. त्यामुळे रेल्वे प्रशासनाची पुढील भूमिका काय असेल, याकडे कर्जत आणि कसारा मार्गावरील प्रवाशांचे लक्ष लागले आहे.
Leave a Reply