ऊस गाळप हंगाम सुरू झाल्याने साखर कारखान्यांच्या परिसरात आणि शेतशिवारात तात्पुरत्या पालांमध्ये वास्तव्यास आलेल्या ऊसतोड कामगारांच्या कुटुंबांसाठी आरोग्य विभागाने विशेष मोहीम हाती घेतली आहे. या मोहिमेत बालकांची आणि गर्भवती महिलांची आरोग्य तपासणी करून त्यांना मोफत उपचार दिले जाणार आहेत. स्थलांतरित कुटुंबांपर्यंत आरोग्यसेवा पोहोचवणे हा या मोहिमेचा मुख्य उद्देश आहे.
बालके आणि गर्भवती महिलांची मोफत तपासणी
या मोहिमेत शून्य ते १८ वर्षे वयोगटातील बालकांची आरोग्य तपासणी केली जाणार आहे. जन्मजात दोष, आजार, पोषणातील कमतरता आणि विकासातील विलंब या निकषांवर बालकांची तपासणी होईल आणि गरजेनुसार उपचार व संदर्भसेवा उपलब्ध करून दिली जाणार आहे. गर्भवती महिलांची प्रसूतीपूर्व तपासणी केली जाईल. त्यांची स्वतंत्र नोंदणी करून जननी पोर्टलवर माहिती अद्ययावत केली जाईल. हिमोग्लोबिन, रक्तदाब, रक्तातील साखर, सोनोग्राफी आणि एचआयव्ही तपासणीसह लोह-कॅल्शियमच्या गोळ्या आणि लसीकरणाची सुविधा मोफत मिळणार आहे. अतिजोखमीच्या गर्भवतींचा नियमित पाठपुरावा केला जाणार असून १०८ आणि १०२ रुग्णवाहिकांद्वारे प्रसूतीसाठी मोफत वाहतूक उपलब्ध असेल.
३० नोव्हेंबरपर्यंत सर्वेक्षण, ७ डिसेंबरपर्यंत अहवाल
पालकमंत्री मेघना बोर्डीकर यांच्या पत्रानुसार राष्ट्रीय आरोग्य अभियानाचे आयुक्त संजय काटकर यांनी राज्यातील जिल्हा आरोग्य यंत्रणांना याबाबत निर्देश दिले आहेत. हे सर्वेक्षण ३० नोव्हेंबर २०२६ पर्यंत पूर्ण करून ७ डिसेंबरपर्यंत अहवाल सादर करण्याचे निर्देश देण्यात आले आहेत. ऊसतोड हंगामात कुटुंबासह स्थलांतर करणाऱ्या कामगारांना आरोग्यसेवेपासून वंचित राहावे लागू नये, यासाठी ही मोहीम राबवली जात आहे.
Leave a Reply