देशातील मोठ्या व्यावसायिक कुटुंबांपैकी एक असलेल्या टीव्हीएस समूहात संपत्तीवरून वाद सुरू आहे. हा वाद आता एका कायदेशीर वळणावर पोहोचला आहे. उद्योगपती वेणु श्रीनिवासन यांची मुलगी लक्ष्मी वेणु यांनी कुटुंबाच्या संयुक्त संपत्तीचे वाटेहिस्से करण्याची मागणी केली आहे. त्यांनी वडिलांनाच थेट नोटीस पाठवली आहे.
कुटुंबाचा व्यवसाय आणि संपत्तीत मुलींनाही समान अधिकार मिळावा, असा मुद्दा त्यांनी मांडला आहे. या वादात मुलीच्या बाजूने आईनेही उडी घेतली आहे. मल्लिका श्रीनिवासन यांनी मुलीच्या दाव्याला पाठिंबा दिला आहे.
हिंदू उत्तराधिकारी कायद्याअंतर्गत त्यांना कुटुंबाच्या संयुक्त मालमत्तेवर कायदेशीर हक्क मागण्याचा अधिकार असल्याचा दावा लक्ष्मी यांनी केला आहे. त्यांचा आरोप आहे की, कुटुंबात आणि व्यवसायातच नाही तर संपत्तीतही त्यांचा भाऊ सुदर्शन वेणु याला प्राधान्य देण्यात आले. हा केवळ कौटुंबिक वाद नाही. यामुळे टीव्हीएस समूहातील विविध कंपन्या, कुटुंबातील वाटेहिस्सा आणि भविष्यातील व्यावसायिक नियंत्रण यामागील गणितेही चर्चेत आली आहेत.
कोणत्या कंपन्यांमध्ये वाटा?
लक्ष्मी वेणु यांनी ज्या कंपन्या आणि मालमत्तांमध्ये वाटा मागितला आहे, त्यामध्ये टीव्हीएस होल्डिंग, टीव्हीएस मोटर कंपनी, टीव्हीएस क्रेडिट सर्व्हिसेस, सुंदरम क्लेटन आणि व्हीएस ट्रस्ट यांचा समावेश आहे. टीव्हीएस होल्डिंग ही समूहाची प्रमुख होल्डिंग कंपनी आहे. टीव्हीएस मोटर कंपनी दुचाकी आणि तीन चाकी वाहने तयार करते. टीव्हीएस क्रेडिट सर्व्हिसेस आर्थिक सेवा आणि कर्जाशी संबंधित व्यापार करते, तर सुंदरम क्लेटन औद्योगिक आणि ऑटोमोटिव्ह घटकांच्या व्यवसायाशी संबंधित आहे.
२०२० मधील व्यवस्था
२०२० मध्ये टीव्हीएस कुटुंबात व्यवसाय आणि कारभाराविषयी मोठा निर्णय घेण्यात आला होता. कुटुंबातील विविध सदस्यांकडे जबाबदारी सोपवत संपत्तीच्या वाटणीसंबंधी एक व्यवस्था करण्यात आली होती. प्रत्येक व्यवसायाकडे अधिक लक्ष देऊन त्याला आर्थिक पाठबळ मिळावे, हा त्यामागील उद्देश होता.
मात्र, लक्ष्मी वेणु यांच्या मते २०२० मध्ये झालेला हा करार टीव्हीएस कुटुंबातील विविध घटकांमध्ये झाला होता. पण वेणु श्रीनिवास यांच्या कुटुंबाच्या संपत्तीत अशी वाटणी झाली नाही. त्यांच्या मते कुटुंबांतर्गत संपत्तीत कोणतीही वाटणी झाली नाही आणि हेच वादाचे मूळ कारण आहे. हा वाद न्यायालयापर्यंत जाण्याची शक्यता व्यक्त केली जात आहे.
Leave a Reply