मालेगाव : दिवाळी म्हणजे आनंद, उत्साह आणि नात्यांमधील स्नेहबंध अधिक दृढ करण्याचा काळ. धकाधकीच्या जीवनात एकमेकांना भेटण्यासाठी वेळ मिळत नाही. कळवाडी येथील आणि परिसरातील दापुरे, नरडाणे, साकूर येथील एकत्र शिक्षण घेतलेले मित्र दरवर्षी दिवाळीनिमित्त एकत्र येतात. यंदाही यानिमित्त स्नेहमेळावा झाला. या मेळाव्यात जुन्या आठवणींना उजाळा देत दिवाळीचा आनंद द्विगुणित करण्यात आला.
शालेय जीवनातील आठवणींना उजाळा
यावेळी मित्रांनी एकमेकांना दिवाळीच्या शुभेच्छा दिल्या. शालेय जीवनातील आठवणी, एकत्र घालवलेले क्षण आणि आयुष्यातील विविध अनुभवांच्या आठवणींनी वातावरणात चैतन्य निर्माण झाले. साधेपणाने झालेल्या या भेटीगाठींमधून मैत्रीतील जिव्हाळा आणि आपुलकीचा प्रत्यय आला. केवळ सणापुरते एकत्र न येता मैत्रीचा हा ऋणानुबंध कायम जपण्याचा निर्धारही मित्रांनी व्यक्त केला.
गावातील शाळांना मदतीचा हात
यातील बहुतांश मित्र गाव परिसरापासून दूर असतात. त्यामुळे मैत्रीची भावना जपत त्यांनी गावातील शाळांना मदतीचा हात देण्यासह सामाजिक बांधिलकी जोपासण्याचा निर्धार केला. भेटीगाठी घेऊन एकमेकांना निरोप देताना मैत्रीचा गोडवा आणि गावाकडच्या मातीशी असलेली नाळ या स्नेहमेळाव्यातून अधोरेखित झाली, अशी भावना यावेळी व्यक्त करण्यात आली.
Leave a Reply