सातारा येथील यशोदा ग्रुप ऑफ इन्स्टिट्यूट्समध्ये संस्थेचे उपाध्यक्ष डॉ. अजिंक्य सगरे यांच्या वाढदिवसानिमित्त बुधवारी, १८ नोव्हेंबर रोजी ‘ज्ञानदीप दिन’ हा शैक्षणिक उपक्रम साजरा होणार आहे. संस्थेच्या सर्व शाखा आणि विभागांमध्ये हा ज्ञानोत्सव होणार आहे.
ग्रंथभेट आणि वाचनाची आवड
कार्यक्रमाची सुरुवात यशोदा माता यांच्या प्रतिमेचे पूजन आणि ग्रंथपूजनाने होणार आहे. शिक्षक, शिक्षकेतर कर्मचारी आणि संस्थेचे हितचिंतक यांनी विद्यार्थ्यांच्या ज्ञानवृद्धीसाठी स्वेच्छेने ग्रंथ भेट द्यावेत, असे आवाहन करण्यात आले आहे. भेट मिळालेल्या ग्रंथांचे संकलन करून त्यांचे प्रदर्शन संबंधित शाखा आणि विभागांच्या ग्रंथालयांमध्ये भरवण्यात येणार आहे. विद्यार्थ्यांमध्ये वाचनाची आवड निर्माण व्हावी, यासाठी ‘ग्रंथ वाचा आणि ग्रंथ मिळवा’ ही संकल्पना राबवण्यात येणार आहे. विद्यार्थ्यांनी आवडीचे पुस्तक वाचून त्याचा सारांश स्वतःच्या शब्दांत हस्तलिखित स्वरूपात सादर करायचा आहे. सारांश सादर करणाऱ्या विद्यार्थ्यांना प्रदर्शनातील आवडीचे पुस्तक भेट म्हणून दिले जाणार आहे.
महिनाभर वाचन प्रेरणा अभियान
१८ नोव्हेंबर ते १८ डिसेंबर २०२६ या कालावधीत महिनाभर ‘वाचन प्रेरणा अभियान’ राबवण्यात येणार आहे. या काळात सर्वाधिक पुस्तके वाचून त्यांचे गुणवत्तापूर्ण सारांश सादर करणाऱ्या विद्यार्थ्याची निवड करून त्याला ‘उत्कृष्ट वाचक पुरस्कार’ दिला जाणार आहे. विद्यार्थ्यांनी हस्तलिखित स्वरूपात सादर केलेल्या पुस्तकांच्या सारांशांचे संकलन करून त्यांचे ‘हस्तलिखित प्रकाशन’ करण्यात येणार आहे. ज्ञानदीप दिनानिमित्त ग्रंथपूजन, ग्रंथभेट, ग्रंथवाटप, पुस्तक वाचन, सारांश लेखन, उत्कृष्ट वाचक पुरस्कार आणि हस्तलिखितांचे प्रकाशन असे विविध उपक्रम होणार आहेत. संस्थेच्या सर्व शाखा आणि विभागांतील प्राचार्य, मुख्याध्यापक, विभागप्रमुख, शिक्षक, शिक्षकेतर कर्मचारी आणि विद्यार्थी यांच्या सहभागातून हा ज्ञानोत्सव साजरा होणार आहे.
Leave a Reply