धुळे : शहरातील मनोहर चित्र मंदिराजवळ असलेला छत्रपती शिवाजी महाराजांचा जुना पुतळा सन्मानपूर्वक स्थलांतरित करून नगावबारी परिसरात स्थापित करावा, अशी मागणी देवपूर युवक शिवजयंती उत्सव समितीने केली आहे. या मागणीचे निवेदन समितीच्या पदाधिकाऱ्यांनी आमदार अनुप अग्रवाल यांना दिले.
जुन्या पुतळ्याचे जतन करण्याची मागणी
मनोहर चित्र मंदिराजवळ जुन्या पुतळ्याच्या जागी नवीन पुतळा उभारण्याचे काम सध्या सुरू आहे. त्यामुळे जुन्या पुतळ्याचे जतन व्हावे आणि त्याची प्रतिष्ठा कायम राहावी, यासाठी तो नगावबारी परिसरात स्थापित करावा, अशी समितीची भूमिका आहे. जुन्या पुतळ्याचे स्थलांतर करणे शक्य न झाल्यास देवपूरमध्ये छत्रपती शिवाजी महाराजांचे स्मारक उभारण्यासाठी प्रयत्न करू, अशी ग्वाही आमदार अग्रवाल यांनी समितीला दिली.
शहराच्या प्रवेशद्वाराला ऐतिहासिक ओळख
नंदुरबार आणि शिरपूरकडून धुळे शहरात प्रवेश करताना नगावबारी हा महत्त्वाचा मार्ग आहे. त्यामुळे येथे स्मारक उभारल्यास शहराच्या प्रवेशद्वाराला ऐतिहासिक आणि सांस्कृतिक ओळख मिळेल, असे समितीने म्हटले आहे. छत्रपती शिवाजी महाराजांचे स्वराज्य, शौर्य, न्याय आणि जनकल्याणाचे विचार नव्या पिढीपर्यंत पोहोचतील, अशी अपेक्षाही समितीने व्यक्त केली. समितीचे अध्यक्ष योगेश गोसावी यांच्यासह समितीचे अनेक पदाधिकारी यावेळी उपस्थित होते.
Leave a Reply