जळगाव जिल्ह्यात रविवारी घडलेल्या एका भीषण अपघातात दुचाकीस्वाराचा मृत्यू झाला असून त्यांच्यासोबत असलेला भाचा जखमी झाला आहे. विटनेर गावाजवळ ही घटना घडली. एका भरधाव वाहनाने दुचाकीला कट मारल्याने चालकाचा तोल गेला आणि दुचाकी खाली कोसळली. त्याचवेळी मागून येणाऱ्या ट्रकखाली दुचाकीस्वार सापडल्याने त्यांचा जागीच मृत्यू झाला.
साखरपुड्याहून परतताना घडला अपघात
मृत व्यक्तीचे नाव अनिल नागो सपकाळे (वय ४३, राहणार दापोरा, तालुका जळगाव) असे आहे. त्यांच्यासोबत त्यांचे भाचे जानकीराम किसन सोनवणे (राहणार दापोरा) होते. दोघेही छत्रपती संभाजीनगर जिल्ह्यातील सिल्लोड येथे एका साखरपुड्याच्या कार्यक्रमाला गेले होते. तेथून घरी परतत असताना विटनेर गावाजवळ त्यांच्या दुचाकीला एका वेगाने येणाऱ्या वाहनाने कट मारला. कट मारल्याने दुचाकीचा तोल गेला आणि मामा-भाचे दोघेही रस्त्यावर कोसळले. त्याचवेळी मागून येणारा ट्रक सपकाळे यांच्या पायावरून गेला, त्यामुळे त्यांना गंभीर दुखापत झाली. सोनवणे यांनाही या अपघातात दुखापत झाली आहे.
रुग्णालयात मृत घोषित; पोलिसांत नोंद
अपघातानंतर जखमी सोनवणे यांनी नातेवाईकांना माहिती दिली. नातेवाईक तातडीने घटनास्थळी पोहोचले आणि दोघांनाही शासकीय वैद्यकीय महाविद्यालय व रुग्णालयात दाखल केले. तेथे डॉक्टरांनी अनिल सपकाळे यांना मृत घोषित केले. या प्रकरणी एमआयडीसी पोलिस ठाण्यात अकस्मात मृत्यूची नोंद करण्यात आली आहे. अपघात घडवून पसार झालेल्या वाहनाचा शोध सुरू असल्याची माहिती मिळाली आहे.
Leave a Reply