पनवेल शहरातील झाडांचे संरक्षण करण्यासाठी महानगरपालिकेने दंडाची नवी नियमावली जाहीर केली आहे. झाडांच्या खोडाला खिळे ठोकणे, त्यावर जाहिरातींचे फलक लावणे किंवा झाडांभोवती विद्युत रोषणाई करणे यांसारख्या प्रकारांमुळे झाडांचे नुकसान होते. अशा कृत्यांवर आता टप्प्याटप्प्याने दंड आकारला जाणार आहे.
महापालिकेचे आयुक्त मंगेश चितळे यांच्या अध्यक्षतेखाली पाच नोव्हेंबर रोजी झालेल्या वृक्ष प्राधिकरण समितीच्या बैठकीत हा निर्णय घेण्यात आला. शहरातील झाडांवर राजकीय, सामाजिक आणि व्यावसायिक जाहिराती लावण्यासाठी खिळे ठोकले जातात. सण-उत्सवांच्या काळात झाडांच्या खोडाभोवती विद्युत दिव्यांच्या माळा गुंडाळल्या जातात. त्यामुळे झाडांच्या वाढीवर आणि आरोग्यावर परिणाम होण्याची शक्यता असते. या प्रकारांना आळा घालण्यासाठी दंडाची टप्याटप्प्याने आकारणी करण्याचा निर्णय घेण्यात आला आहे.
टप्प्याटप्प्याने दंडाची रचना
या निर्णयानुसार पहिल्या उल्लंघनासाठी प्रत्येक झाडामागे एक हजार रुपये, दुसऱ्या उल्लंघनासाठी तीन हजार रुपये आणि तिसऱ्या उल्लंघनासाठी पाच हजार रुपये दंड आकारला जाणार आहे. चौथ्यांदा नियमभंग झाल्यास संबंधित प्रभाग अधिकाऱ्यांना महाराष्ट्र झाडांचे संरक्षण व जतन अधिनियम, १९७५ मधील कलम २१(१) अंतर्गत कारवाई करून गुन्हा दाखल करण्याचा अधिकार असेल.
झाडांची छाटणी आणि शुल्क
नागरिकांनी स्वतःच्या खर्चाने झाडांची छाटणी केल्यास झाडामागे २५० रुपये शुल्क भरावे लागणार आहे. महापालिकेमार्फत छाटणी करून घेतल्यास प्रत्येक झाडासाठी १२०० रुपये शुल्क आकारले जाणार आहे. या निर्णयामुळे झाडांवर जाहिराती लावणाऱ्या व्यावसायिक संस्था, राजकीय पक्षांचे कार्यकर्ते तसेच विविध कार्यक्रमांचे आयोजक यांना नियमांचे पालन करावे लागणार आहे. मात्र, या निर्णयाची प्रत्यक्ष अंमलबजावणी कशी होणार, नियमभंग करणाऱ्यांवर लक्ष ठेवण्याची जबाबदारी कोणाची असेल आणि दंडात्मक कारवाईसाठी स्वतंत्र पथक नेमले जाणार का, याकडे आता नागरिकांचे लक्ष लागले आहे. झाडे ही शहराची नैसर्गिक संपत्ती असून त्यांचे संरक्षण करणे ही केवळ महापालिकेचीच नव्हे तर प्रत्येक नागरिकाची जबाबदारी आहे.
Leave a Reply