सिडको घरांची सोडत २७ नोव्हेंबरला; अर्जदारांना १० दिवसांची मुभा

पनवेल: सिडकोच्या माझे पसंतीचे सिडकोचे घर या प्रधानमंत्री आवास योजना १.० अंतर्गत डिसेंबर २०२५ मध्ये जाहीर करण्यात आलेल्या गृहनिर्माण योजनेतील बिगर-ईडब्ल्यूएस प्रवर्गातील सदनिकांची सोडत जाहीर करण्यात आली आहे. या प्रवर्गातील सदनिकांसाठीची सोडत २७ नोव्हेंबर २०२६ रोजी घेण्यात येणार आहे.

या योजनेतील आर्थिकदृष्ट्या दुर्बल घटक प्रवर्गातील अर्जदारांची सोडत यापूर्वीच पार पडली आहे. अल्प उत्पन्न गटातील अर्जदारांसाठीची सोडत न्यायालयाने दिलेल्या अंतरिम आदेशाच्या पार्श्वभूमीवर यापूर्वी स्थगित करण्यात आली होती. त्यानंतर या संदर्भात दाखल करण्यात आलेल्या याचिका न्यायालयाने फेटाळून लावल्या आहेत. डिसेंबर २०२५ मधील गृहनिर्माण योजनेत नमूद करण्यात आलेला एलआयजी हा शब्द या योजनेच्या प्रयोजनार्थ बिगर-ईडब्ल्यूएस या अर्थाने अभिप्रेत असून, यापुढे त्याच अर्थाने त्याचा अन्वयार्थ लावण्यात येईल, असे सिडकोतर्फे स्पष्ट करण्यात आले आहे. योजनेच्या इतर सर्व अटी व शर्ती पूर्वीप्रमाणेच कायम राहतील आणि लागू राहतील.

अर्ज मागे घेण्यासाठी दहा दिवसांची मुभा

योजनेतून माघार घेणे अथवा सदनिकेवरील दावा सोडणे हा पूर्णपणे ऐच्छिक पर्याय आहे. ज्या अर्जदारांना या योजनेत सहभागी व्हायचे नाही, त्यांना या घोषणेच्या प्रसिद्धीच्या तारखेपासून दहा दिवसांच्या आत आपला अर्ज मागे घेता येईल अथवा सदनिकेवरील आपला दावा सोडता येईल. यासाठी संबंधित अर्जदारांना त्यांच्या अर्जदार लॉगिनमधील ऑनलाइन सुविधेचा वापर करावा लागेल. अर्जदाराच्या लॉगिनमधून ऑनलाइन पद्धतीने सादर केलेल्या विनंत्याच स्वीकारल्या जातील. निर्धारित दहा दिवसांच्या मुदतीत हा पर्याय न निवडणाऱ्या अर्जदारांनी जाहीर करण्यात आलेली व्यवस्था मान्य केली आहे, असे गृहीत धरले जाईल आणि त्यांचा सोडतीतील सहभाग कायम राहील.

रक्कम परताव्याची व्यवस्था

अर्ज मागे घेणाऱ्या अथवा सदनिकेवरील दावा सोडणाऱ्या अर्जदारांना सोडतीत सहभागी होता येणार नाही किंवा या योजनेअंतर्गत फेरविचाराची मागणीही करता येणार नाही. अशा अर्जदारांनी भरलेली बुकिंग रक्कम कोणतीही कपात न करता पूर्णपणे परत करण्यात येईल. अर्ज मागे घेण्याची विनंती सादर केल्यापासून पुढील पंधरा दिवसांच्या आत ही रक्कम परत केली जाईल. तथापि, अर्ज नोंदणीच्या वेळी अर्जदाराने सादर केलेल्या बँक खात्याचा तपशील अचूक व वैध असणे आवश्यक आहे. सिडकोने संबंधित सर्व अर्जदारांना या घोषणेची, तसेच अर्ज मागे घेण्यासाठी किंवा सदनिकेवरील दावा सोडण्यासाठी निश्चित करण्यात आलेल्या मुदतीची व प्रक्रियेची नोंद घेण्याचे आवाहन केले आहे.