गावातच वेळेवर आणि दर्जेदार उपचार मिळावेत, या हेतूने उभारलेली आरोग्य उपकेंद्रे गोंदिया जिल्ह्यात अडचणीत सापडली आहेत. जिल्ह्यातील एकूण २६३ उपकेंद्रांपैकी २८ केंद्रांच्या इमारती जीर्ण झाल्या आहेत. त्याचबरोबर आरोग्य विभागातील १,१८७ मंजूर पदांपैकी ३९४ पदे रिक्त असल्याने उरलेल्या कर्मचाऱ्यांवर कामाचा अतिरिक्त भार पडत आहे.
जीर्ण इमारती आणि मंजुरीची प्रतीक्षा
जीर्ण झालेल्या २८ उपकेंद्रांसह सात प्राथमिक आरोग्य केंद्रांच्या इमारतींचीही अवस्था बिकट झाली आहे. ठाणा, बनगाव, कुन्हाडी आणि महागाड या केंद्रांचा त्यात समावेश आहे. या इमारतींच्या दुरुस्तीसाठी किंवा नव्या बांधकामासाठी आरोग्य विभागाने शासनाकडे प्रस्ताव पाठवले आहेत. मात्र, मंजुरी मिळाल्यानंतरच बांधकाम सुरू होणार असल्याने संबंधित केंद्रांना प्रतीक्षा करावी लागत आहे. मंजुरीच्या प्रतीक्षेत केंद्रांमधील आरोग्यसेवेवर परिणाम होत आहे.
रिक्त पदे आणि औषधांचा तुटवडा
विभागात मंजूर असलेल्या १,१८७ पदांपैकी ७४६ पदे भरली गेली आहेत, तर ३९४ पदे रिक्त आहेत. ही रिक्त पदे कंत्राटी पद्धतीने लवकरच भरण्यात येणार असल्याची माहिती आहे. अनेक प्राथमिक आरोग्य केंद्रे आणि उपकेंद्रांमध्ये औषधांसह डॉक्टरांचीही वानवा आहे. त्यामुळे उपचारासाठी आलेल्या ग्रामस्थांना आल्यापावली परतावे लागत असून प्रसंगी खासगी डॉक्टरांचा आधार घ्यावा लागत आहे. रिक्त पदे तातडीने भरावीत आणि औषधांचा पुरेसा साठा उपलब्ध करून द्यावा, अशी ग्रामस्थांची अपेक्षा आहे.
Leave a Reply