सिंहस्थ कुंभमेळ्याच्या पार्श्वभूमीवर कुंभमेळा प्राधिकरणाचे अधिकृत खाते असल्याचे भासवून नागरिकांची दिशाभूल करणारे बनावट इन्स्टाग्राम खाते तयार करण्यात आल्याचा प्रकार उघडकीस आला आहे. शहर सायबर पोलिसांच्या सोशल मीडिया पेट्रोलिंगदरम्यान हा प्रकार समोर आला असून माहिती तंत्रज्ञान कायद्यानुसार गुन्हा दाखल करण्यात आला आहे.
शहर सायबर पोलिसांची रविवारी सोशल मीडिया प्लॅटफॉर्मवर सायबर पेट्रोलिंग सुरू होती. त्यावेळी इन्स्टाग्रामवरील ‘ऑफिशियल.कुंभनगरी_नाशिक’ या खात्याची पाहणी करण्यात आली. या खात्यावर सिंहस्थ कुंभमेळ्याशी संबंधित विविध कार्यक्रमांचे रिल्स आणि पोस्ट प्रसारित करण्यात येत होते. मात्र, पाहणीत हे खाते सिंहस्थ कुंभमेळा प्राधिकरण, नाशिक या शासकीय कार्यालयाचे अधिकृत सोशल मीडिया पेज असल्याचा आभास निर्माण करत असल्याचे निदर्शनास आले.
नागरिकांची दिशाभूल कशी झाली
शासकीय यंत्रणेचे अधिकृत खाते असल्याचे भासवून या खात्यावरून माहिती प्रसारित केली जात होती. त्यामुळे नागरिकांची दिशाभूल होत असल्याचे स्पष्ट झाले. शासकीय कार्यालयाचे नाव वापरून खोटी माहिती पसरवणे हा गंभीर प्रकार असून त्याबाबत माहिती तंत्रज्ञान कायद्यानुसार गुन्हा दाखल करण्यात आला आहे.
पोलिसांचे नागरिकांना आवाहन
कुंभमेळा तसेच शासकीय योजना आणि विविध कार्यक्रमांसंदर्भातील माहिती नागरिकांनी केवळ शासनाच्या अधिकृत आणि सत्यापित सोशल मीडिया खात्यांवरूनच घ्यावी, असे आवाहन पोलीस आयुक्तालयाकडून करण्यात आले आहे. सोशल मीडियावरील कोणत्याही खात्याला शासकीय अधिकृत पेज समजण्यापूर्वी त्याची सत्यता तपासावी, असेही पोलिसांनी सांगितले आहे.
बनावट खात्यांवरील माहिती, लिंक किंवा संदेशांवर विश्वास ठेवू नये, असे आवाहनही करण्यात आले आहे. कुंभमेळ्याच्या काळात अशी बनावट खाती नागरिकांची फसवणूक करू शकतात, त्यामुळे सतर्क राहणे गरजेचे आहे.
Leave a Reply