आदिवासी समाजाच्या हक्कांसाठी सातत्याने संघर्ष करणाऱ्या श्रमजीवी संघटनेचा ४४ वा वर्धापन दिन तथा कृतज्ञता दिन इगतपुरी तालुक्यातील वाळविहीर (बैरोबाचीवाडी) येथे साजरा झाला. या वेळी संघटनेच्या संघर्षातून आदिवासी समाजाला मिळालेल्या विविध हक्कांची आणि शासनाच्या निर्णयांची माहिती देण्यात आली.
हक्कांचा कायदा गरजेचा
जल, जंगल, जमीन, वनपट्टे, आधारकार्ड, जातीचे दाखले, रेशनकार्ड, घरकुल तसेच घराखालील जागा या प्रश्नांसाठी संघटनेने सातत्याने लढा दिला असून त्यामुळे अनेक प्रश्न सुटले आहेत. आदिवासींच्या हक्कांचे संरक्षण व्हावे आणि शासनाच्या निर्णयांची अंमलबजावणी व्हावी, यासाठी आदिवासी हिताचा हक्काचा कायदा गरजेचा असल्याची भूमिका या वेळी मांडण्यात आली.
संघटनेचे कार्याध्यक्ष बाळाराम भोईर म्हणाले, की आदिवासींना आपले हक्क सहजासहजी मिळालेले नाहीत. विवेक पंडित यांच्या मार्गदर्शनाखाली आणि संघटनेच्या सातत्यपूर्ण संघर्षामुळे अनेक शासन निर्णय झाले आणि विविध हक्क मिळाले. मात्र हे निर्णय केवळ कागदावर राहू नयेत, तर त्यांची गावागावांत अंमलबजावणी व्हावी, यासाठी संघटितपणे संघर्ष करणे गरजेचे आहे.
पारंपरिक कार्यक्रमांची रंगत
कार्यक्रमात २७ तारखेच्या संविधान हक्क संघर्ष मोर्चातील मागण्या, शासन निर्णय आणि त्यांची अंमलबजावणी याबाबत मार्गदर्शन करण्यात आले. आदिवासी समाजाच्या पारंपरिक रानभाज्या, करांदे, चाईची भाजी, कडूकंद, उलस आदींचा नैवेद्य करण्यात आला. कांबड नाच, मोरगा नाच सादर झाला आणि आदिवासी गीतांवर चिमुकल्यांनी नृत्य सादर केले.
या वेळी विलास शेलार, जिल्हा सरचिटणीस संजय शिंदे, तालुकाध्यक्ष गोकुळ हिलम, तालुका सचिव सुनील वाघ, शिवराम ठोंबरे, तुळशीराम ठोंबरे, संपत लोते, सखूबाई भस्मे, संगीता आवाली, तुकाराम झुगरे, अलका आघान आणि गंगाराम वाघ उपस्थित होते.
Leave a Reply