दहिवद येथील शिरपूर सहकारी साखर कारखाना भाडेतत्त्वावर घेतलेल्या माँ रेवा शुगर्स प्रा. लि.तर्फे २०२६-२७ या हंगामासाठी उसाला प्रतिटन तीन हजार ४११ रुपयांचा दर जाहीर करण्यात आला आहे. कारखान्याच्या जागेवर सोमवारी, १६ नोव्हेंबर रोजी मोळीपूजन होणार आहे.
आमदार अमरिशभाई पटेल यांच्या प्रमुख उपस्थितीत शनिवारी, १४ नोव्हेंबर रोजी जनक व्हिला येथे माँ रेवा शुगर्स प्रा. लि.चे संचालक आणि कारखान्याच्या संचालक मंडळाची बैठक झाली. तीत चर्चेअंती रेवा शुगर्सचे संचालक अंकित गोयल यांनी उसाला प्रतिटन तीन हजार ४११ रुपयांचा दर देणार असल्याची घोषणा केली. कारखान्याचे अध्यक्ष माधवराव पाटील, उपाध्यक्ष दिलीप पटेल, महाव्यवस्थापक गणेश यादव यांच्यासह संचालक मंडळाचे सदस्य आणि शेतकरी या वेळी उपस्थित होते.
शेतकरी हित जोपासण्याचे आश्वासन
रेवा शुगर्सच्या माध्यमातून साखर कारखाना सुरळीतपणे सुरू राहावा, त्याची भरभराट व्हावी आणि ऊस उत्पादक शेतकऱ्यांचे हित जपले जावे, यासाठी आपले पूर्ण समर्थन व पाठबळ राहील, असे आमदार पटेल यांनी सांगितले. कारखान्याने भविष्यात यशस्वी वाटचाल करावी आणि शेतकऱ्यांसह कारखान्याशी संबंधित सर्व घटकांची प्रगती व्हावी, अशा सदिच्छा त्यांनी दिल्या.
१६ वर्षांनंतर पुन्हा उत्पादन
शिरपूर साखर कारखाना तालुक्याचा आर्थिक कणा म्हणून ओळखला जातो. मात्र २०१० मध्ये थकित कर्जाच्या वसुलीसाठी जिल्हा बँकेने जप्तीची कारवाई केल्यापासून कारखाना बंद होता. दीर्घकाळ बंद राहिल्यामुळे तेथे कोणाचीही वर्दळ नव्हती आणि हा परिसर ओसाड झाला होता. रेवा शुगर्सकडे भाडेतत्त्वावर हस्तांतरण झाल्यानंतर कारखान्याचा परिसर पुन्हा गजबजला आहे. कारखान्यात १६ वर्षांनंतर पुन्हा साखरेचे उत्पादन होणार असून, उसाचे अर्थचक्र गतिमान होणार आहे.
सोमवारी मोळीपूजनाच्या कार्यक्रमात नवचंडी यज्ञ व अन्य विधी केले जातील. लोकप्रतिनिधी, संचालक व शेतकरी उपस्थित राहतील. यापूर्वी २० ऑक्टोबरला आमदार अमरिशभाई पटेल, आमदार काशीराम पावरा आणि अंकित गोयल यांच्या उपस्थितीत कारखान्यात बॉयलर प्रज्वलन करण्यात आले होते. यंदाच्या हंगामात गळीत प्रक्रिया अधिक कार्यक्षम, सुरक्षित आणि गुणवत्तापूर्ण करण्यावर विशेष भर दिला जाणार आहे. ऊसतोडणी, ऊस वाहतूक आणि गळीत प्रक्रिया पारदर्शक पद्धतीने आणि निर्धारित वेळेत पूर्ण करण्यासाठी कारखाना व्यवस्थापन कटिबद्ध असल्याचे महाव्यवस्थापक गणेश यादव यांनी सांगितले.
Leave a Reply