इयत्ता पहिली ते बारावीला अध्यापन करणाऱ्या शिक्षकांचे दहा दिवसांचे प्रशिक्षण देवळा येथील कर्मवीर रामरावजी आहेर महाविद्यालयात सुरू झाले आहे. शुक्रवार १३ नोव्हेंबर ते २२ नोव्हेंबर या कालावधीत हे प्रशिक्षण चालणार आहे. ज्यांची शिक्षकसेवा बारा वर्षे आणि चोवीस वर्षे पूर्ण झाली आहे, अशा शिक्षकांचा यात समावेश आहे. प्रशिक्षण सकाळी साडे नऊ ते सायंकाळी साडेपाच या वेळेत असून प्रशिक्षण काळात प्रत्येक तासाची हजेरी घेतली जाते आणि ती लगेच अपलोड केली जाते.
नवनवीन धोरणांची माहिती
अध्ययन-अध्यापनातील नवनवीन धोरणांबाबत या प्रशिक्षणात माहिती दिली जात आहे. निवड श्रेणी आणि वरिष्ठ श्रेणी असे गट तयार करण्यात आले असून त्यात वेगवेगळे उपक्रम राबवले जातात. राज्य शैक्षणिक संशोधन व प्रशिक्षण परिषद आणि जिल्हा शिक्षण व प्रशिक्षण संस्था नाशिक यांच्यामार्फत या प्रशिक्षणाचे आयोजन करण्यात आले आहे.
७६ शिक्षकांचा सहभाग
या प्रशिक्षणात तालुक्यातील ७६ शिक्षकांचा समावेश आहे. मुख्याध्यापक डॉ. सुनील आहेर, केतन आहेर, वंदना भामरे, हेमंत महिरे, सोनाली भामरे, राकेश निकम हे सहतज्ज्ञ मार्गदर्शक म्हणून कामकाज करत आहेत. प्रशिक्षणाचे मुख्य समन्वयक गटशिक्षणाधिकारी सतीश बच्छाव असून उपसमन्वयक म्हणून केंद्रप्रमुख पी. के. आहेर कामकाज पाहत आहेत. विशेष तज्ज्ञ मदतनीस म्हणून लक्ष्मण सूर्यवंशी कामकाज करत आहेत. अशाच प्रकारचे प्रशिक्षण बागलाण, कळवण, मालेगाव, दिंडोरी, इगतपुरी आणि चांदवड या तालुक्यांमध्येही चालू आहे.
Leave a Reply