भारतात दरवर्षी १४ नोव्हेंबर रोजी बालदिन साजरा केला जातो. हा दिवस देशाचे पहिले पंतप्रधान पंडित जवाहरलाल नेहरू यांच्या जयंतीनिमित्त साजरा केला जातो. त्यांचा जन्म १४ नोव्हेंबर १८८९ रोजी अलाहाबाद येथे झाला होता. आताच्या प्रयागराज शहरात त्यांचा जन्म झाला. मुले त्यांना प्रेमाने चाचा नेहरू म्हणत असत. या दिवशी शाळांमध्ये मुलांसाठी विविध कार्यक्रमांचे आयोजन केले जाते.
१४ नोव्हेंबर हीच तारीख का?
बालदिन साजरा करण्याची तारीख जवाहरलाल नेहरूंशी जोडलेली आहे. १९६४ मध्ये नेहरूंच्या निधनानंतर, त्यांची जयंती म्हणजेच १४ नोव्हेंबर हा दिवस बालदिन म्हणून साजरा करण्याचे ठरवण्यात आले. यापूर्वी भारतात २० नोव्हेंबर रोजी बालदिन साजरा केला जात असे. ही तारीख संयुक्त राष्ट्रांच्या जागतिक बालदिनाशी जोडलेली होती. नेहरूंचा मुलांवर अतीव जीव होता आणि त्यांच्या विकासावर, शिक्षणावर व उज्ज्वल भविष्यावर त्यांचा विश्वास होता. म्हणूनच त्यांच्या स्मरणार्थ त्यांचा वाढदिवस मुलांना समर्पित करण्यात आला.
चाचा नेहरू आणि मुले
पंडित जवाहरलाल नेहरू हे स्वतंत्र भारताचे पहिले पंतप्रधान होते. त्यांनी देशाच्या स्वातंत्र्य लढ्यात भाग घेतला आणि स्वातंत्र्यानंतर १९४७ ते १९६४ या काळात पंतप्रधान म्हणून काम पाहिले. मुलांवरील प्रेमामुळे ते चाचा नेहरू म्हणून ओळखले जात. देशाचे भविष्य मुलांवर अवलंबून आहे, असा त्यांचा विश्वास होता. त्यामुळे त्यांनी मुलांचे शिक्षण, आरोग्य आणि चांगले वातावरण अत्यावश्यक मानले. नेहरूंचा असा विश्वास होता की मुलांना प्रगतीसाठी योग्य संधी दिल्या पाहिजेत, जेणेकरून ते मोठे झाल्यावर राष्ट्राच्या विकासात योगदान देऊ शकतील.
१४ नोव्हेंबर १९५७ रोजी मुलांना दिलेल्या एका संदेशात त्यांनी अभ्यासासोबतच खेळ आणि इतर सर्जनशील उपक्रमांच्या महत्त्वावर जोर दिला होता. मुलांनी भीतीऐवजी धैर्याने पुढे जावे, अशी त्यांची इच्छा होती. मुलांना केवळ पुस्तकी ज्ञानापुरते मर्यादित न ठेवता, त्यांना खेळण्याची, लिहिण्याची, वाचण्याची, गाण्याची आणि त्यांच्या आवडीच्या गोष्टी करण्याची संधीही दिली पाहिजे, असे त्यांचे मत होते.
बालदिनाचे महत्त्व
बालदिन हा केवळ उत्सवाचा दिवस नसून, मुलांच्या गरजा आणि हक्कांवर लक्ष केंद्रित करण्याची एक संधी देखील आहे. प्रत्येक मुलाला दर्जेदार शिक्षण, पौष्टिक आहार, वैद्यकीय सेवा, संरक्षण आणि विकासाच्या समान संधी मिळण्याचा हक्क आहे. मुलांना बालमजुरी, हिंसाचार, भेदभाव आणि शोषणापासून वाचवणे ही समाजाची जबाबदारी आहे. या दिवशी शाळा आणि इतर संस्था मुलांसाठी विशेष कार्यक्रमांचे आयोजन करतात. अनेक ठिकाणी क्रीडा आणि सांस्कृतिक कार्यक्रम, भाषण, चित्रकला स्पर्धा आणि इतर स्पर्धा घेतल्या जातात. मुलांना भेटवस्तू दिल्या जातात आणि त्यांच्या कलागुणांचा गौरव केला जातो. मुलांचे बालपण आनंदी आणि भविष्य सुरक्षित करणे ही प्रत्येकाची जबाबदारी आहे, याची आठवण बालदिन आपल्याला करून देतो.
Leave a Reply