न्यूझीलंडविरुद्धच्या पाचव्या आणि निर्णायक एकदिवसीय सामन्यात भारतीय संघाच्या दोन सर्वात अनुभवी फलंदाजांनी पुन्हा एकदा निराशा केली आहे. रोहित शर्मा आणि विराट कोहली दोघेही स्वस्तात बाद झाले. त्यामुळे भारताचा डाव सुरुवातीलाच अडचणीत सापडला.
बे ओव्हल मैदानावर सुरू असलेल्या या सामन्यात न्यूझीलंडने नाणेफेक जिंकून पहिल्यांदा गोलंदाजी करण्याचा निर्णय घेतला. या निर्णयाचा त्यांच्या गोलंदाजांनी पुरेपूर फायदा घेतला. भारताला सलामीला अपेक्षित अशी सुरुवात मिळालीच नाही.
रोहित सात, कोहली पाच धावांवर बाद
सलामीला आलेला रोहित शर्मा केवळ सात धावा करून बाद झाला. त्याने तेरा चेंडूंचा सामना केला. त्याच्या बॅटमधून एकही मोठा फटका आला नाही. न्यूझीलंडच्या गोलंदाजांनी त्याला अचूक टप्प्यावर गोलंदाजी करत बांधून ठेवले.
रोहित बाद झाल्यानंतर विराट कोहली मैदानावर आला. संपूर्ण स्टेडियममध्ये कोहलीच्या नावाचा गजर सुरू होता. मात्र कोहलीही चाहत्यांच्या अपेक्षा पूर्ण करू शकला नाही. तो केवळ पाच धावा करून बाद झाला. मॅथ्यू फिशरच्या चेंडूवर त्याने मोठा फटका मारण्याचा प्रयत्न केला, मात्र चेंडू बॅटची कड घेऊन यष्टिरक्षकाच्या हातात गेला. टिम सायफर्टने अप्रतिम झेल घेतला.
विशेष म्हणजे रोहित आणि कोहली दोघांनाही मॅथ्यू फिशरनेच बाद केले. या दोन विकेटमुळे भारताची अवस्था ३३ धावांवर दोन बाद अशी झाली होती. त्यानंतर ऋतुराज गायकवाडही ३४ धावांवर बाद झाला आणि भारत ३४ धावांवर तीन बाद अशा बिकट परिस्थितीत सापडला.
रोहित-कोहलीसाठी ही मालिका निराशाजनक
ही मालिका रोहित आणि कोहलीसाठी अजिबात चांगली ठरलेली नाही. चौथ्या एकदिवसीय सामन्यात तर दोघेही शून्यावर बाद झाले होते. मॅट हेन्रीने पहिल्याच षटकात दोघांसह अय्यरला बाद करत भारताला शून्य धावांवर तीन धक्के दिले होते. त्या सामन्यात भारताचा संपूर्ण संघ केवळ ८९ धावांवर सर्वबाद झाला होता आणि भारताला २४४ धावांनी पराभव स्वीकारावा लागला होता.
पाचव्या सामन्यात हेन्री खेळत नव्हता, त्यामुळे रोहित आणि कोहली मोठी खेळी करतील, अशी आशा होती. मात्र ती आशाही फोल ठरली. या संपूर्ण मालिकेत कोहलीने केवळ ८६ धावा केल्या आहेत. हा त्याच्या कारकिर्दीतील सर्वात वाईट मालिकांपैकी एक ठरली आहे. आता उर्वरित खेळाडू किती धावा करतात, हे पाहणे महत्त्वाचे ठरणार आहे.
Leave a Reply