राष्ट्रवादी विलिनीकरणात अध्यक्षपदाचा अडसर; नियंत्रणाची भीती

राष्ट्रवादी काँग्रेसच्या दोन्ही गटांच्या विलीनीकरणाची चर्चा गेल्या आठवडाभरापासून राजकीय वर्तुळात सुरू आहे. केंद्रीय गृहमंत्री अमित शहा यांच्या दोन दिवसांच्या पुणे दौऱ्यामुळे या चर्चांना पुन्हा वेग येण्याची शक्यता वर्तवली जात आहे. विलीनीकरणाबाबत दोन्ही बाजूंकडून सातत्याने नकार दिला जात असला, तरी प्रत्यक्षात पक्षाच्या राष्ट्रीय अध्यक्षपदावरून मतभेद असल्याची चर्चा आहे.

पक्षाची सूत्रे कोणाकडे राहणार?

दोन्ही गट एकत्र आल्यास पक्षाचे राष्ट्रीय नेतृत्व कोणाकडे राहणार, हा कळीचा मुद्दा ठरणार असल्याचे सांगितले जाते. ज्येष्ठ नेते शरद पवार यांच्याकडे राष्ट्रीय अध्यक्षपद गेल्यास पक्षावरील राजकीय नियंत्रण कमी होण्याची भीती दुसऱ्या गटाला असल्याची चर्चा आहे. त्यामुळे विलीनीकरणानंतर पक्षाची सूत्रे कोणाकडे राहणार, यावर आधी एकमत होणे आवश्यक असल्याचे राजकीय निरीक्षकांचे मत आहे. अध्यक्षपदाचा प्रश्न सुटल्याशिवाय विलीनीकरणाची प्रक्रिया पुढे जाणे अवघड मानले जात आहे.

बारामती दौऱ्यापूर्वी निर्णयाची अपेक्षा

पंतप्रधान नरेंद्र मोदी यांचा बारामती दौरा नियोजित आहे. या दौऱ्यापूर्वी राष्ट्रवादीच्या दोन्ही गटांच्या विलीनीकरणाबाबत निर्णय व्हावा, अशी अपेक्षा काही स्तरांतून व्यक्त होत असल्याची माहिती आहे. त्यापूर्वीच अमित शहा पुणे दौऱ्यावर येत असल्याने राज्यातील भाजप आणि राष्ट्रवादीच्या नेत्यांमध्ये या विषयावर चर्चा होण्याची शक्यता आहे.

दोन्ही बाजूंकडून चर्चेचा इन्कार

खासदार सुप्रिया सुळे आणि आमदार रोहित पवार यांनीही विलीनीकरणाचा प्रस्ताव नसल्याचे आणि त्याबाबत चर्चा सुरू नसल्याचे स्पष्ट केले आहे. राष्ट्रवादी काँग्रेसचे राष्ट्रीय मुख्य प्रवक्ते उमेश पाटील यांनीही गेल्या आठवडाभरापासून तथाकथित सूत्रांच्या हवाल्याने विलीनीकरणाच्या बातम्या प्रसारित केल्या जात आहेत, मात्र या संदर्भात कोणतीही चर्चा सुरू नाही, असे स्पष्ट केले. ना औपचारिक, ना अनौपचारिक; ना आमच्या बाजूने, ना त्यांच्या बाजूने कोणतीही चर्चा सुरू नाही, असे त्यांनी म्हटले.

रोहित पवार यांनी दोन्ही राष्ट्रवादींच्या विलीनीकरणाची चर्चा तर नाहीच, भाजपसोबत असताना तो विषयही येत नाही, असे सांगत मुख्यमंत्री आणि भाजपवर नेम धरला. आमच्याशिवाय दोन्ही राष्ट्रवादीचे एकत्रीकरण होणार नाही, हे मुख्यमंत्र्यांनी केलेले वक्तव्य म्हणजे केवळ सत्तेचा अहंकार असल्याची टीका त्यांनी केली. पिंपरी-चिंचवड महानगरपालिका निवडणुकीत मुंढवाप्रकरणी ब्लॅकमेल करण्याचा प्रयत्न करूनही अजित पवारांनी भाजपला भीक घातली नव्हती, असेही ते म्हणाले.

स्रोत: मूळ बातमी