मराठी मालिका विश्वातील लोकप्रिय अभिनेत्री संयोगिता भावे यांनी आपल्या अभिनयाने प्रेक्षकांच्या मनात विशेष स्थान निर्माण केले आहे. ‘लग्नानंतर होईलच प्रेम’ या मालिकेमुळे त्या घराघरांत पोहोचल्या. मात्र, त्यांच्या आयुष्यात एक असा कठीण काळ आला होता, ज्यामध्ये त्यांना कॅन्सरसारख्या गंभीर आजाराचा सामना करावा लागला. नुकत्याच दिलेल्या एका मुलाखतीत संयोगिता यांनी आपल्या कॅन्सर जर्नीबद्दल अनेक धक्कादायक आणि भावनिक खुलासे केले आहेत.
आईचा आजार आणि तिची साथ गमावणे
‘सोनचाफा प्रोडक्शन’ या यूट्यूब चॅनेलला दिलेल्या मुलाखतीत त्यांनी आईला झालेला कॅन्सर, स्वतःच्या आजाराचे निदान आणि उपचारांदरम्यान आलेल्या अडचणींबद्दल सांगितले. त्यांच्या आईला आधी ब्रेस्ट कॅन्सर झाला होता. त्यानंतर त्यांना लिम्फोमाचेही निदान झाले. मात्र, दुर्दैवाने आईला या आजारातून वाचवता आले नाही. आई त्यांच्यासाठी सर्वस्व होती. त्यामुळे आईला गमावण्याचा धक्का त्यांच्यासाठी अत्यंत मोठा होता.
डाव्या ब्रेस्टमध्ये १६ गाठी
आईला ब्रेस्ट कॅन्सर झाल्यामुळे डॉक्टरांनी संयोगिता यांनाही नियमित तपासण्या करण्याचा सल्ला दिला होता. त्यानुसार त्या वेळोवेळी तपासण्या करत होत्या. मार्च २०१८ मध्ये त्यांना एक छोटीशी गाठ जाणवली होती. त्यावेळी त्यांनी फाइन नीडल टेस्ट करून घेतली. मात्र, ती गाठ कॅन्सरची नसल्याचे स्पष्ट झाले. पुढे जानेवारी-फेब्रुवारी २०१९ मध्ये त्यांच्या डाव्या ब्रेस्टमध्ये अनेक गाठी जाणवू लागल्या. डॉक्टरांच्या सल्ल्यानुसार त्यांनी मॅमोग्राम केला. या तपासणीत ब्रेस्टमध्ये क्लस्टर असल्याचे समोर आले. त्यामध्ये तब्बल १६ छोट्या नोड्स होत्या. त्यानंतर करण्यात आलेली फाइन नीडल टेस्ट पॉझिटिव्ह आली आणि त्यांना कॅन्सर असल्याचे निदान झाले.
ऑपरेशन, इन्फेक्शन आणि सहा केमोथेरपी
कॅन्सर असल्याचे समजताच संयोगिता यांना मोठा मानसिक धक्का बसला. पुढे काय होणार, उपचार कसे असणार, कामाचे काय होणार आणि उपचारांचे साइड इफेक्ट्स कसे असतील, असे अनेक प्रश्न त्यांच्या मनात निर्माण झाले होते. यानंतर त्यांनी दुसऱ्या डॉक्टरांचाही सल्ला घेतला. पेट स्कॅन केल्यानंतर कॅन्सर शरीरात इतरत्र पसरलेला नसल्याचे स्पष्ट झाले. त्यामुळे डॉक्टरांनी तातडीने ऑपरेशन करण्याचा निर्णय घेतला. ऑपरेशनसाठी भूल देण्यात आली, तेव्हा त्यांनी श्रीरामाचा जप सुरू केला होता. ऑपरेशन कधी झाले, हेही त्यांना कळले नाही. शुद्धीवर येत असताना त्या वारंवार ‘मी बरी आहे, तुम्ही कसे आहात?’ असे म्हणत होत्या. मात्र, ऑपरेशननंतर त्यांना इन्फेक्शन झाले. त्यामुळे उपचारांमध्ये आणखी २० दिवस गेले.
ऑपरेशन आणि इन्फेक्शननंतर संयोगिता यांच्या केमोथेरपीला सुरुवात झाली. त्यांना २१ दिवसांच्या अंतराने एक अशा एकूण सहा केमोथेरपी घ्याव्या लागल्या. पहिल्या केमोनंतर डॉक्टरांनी त्यांना विशेष डाएट पाळण्याचा सल्ला दिला. रोज चार अंडी आणि ड्रायफ्रुट्स खाण्यास सांगण्यात आले होते. तसेच कच्चे पदार्थ खाणे टाळण्याच्या सूचनाही देण्यात आल्या होत्या. विशेष म्हणजे, संयोगिता या शाकाहारी होत्या. त्यामुळे रोज चार अंडी खाणे त्यांच्यासाठी मोठे आव्हान होते. मात्र, केमोथेरपीदरम्यान शरीरातील प्रोटीनची गरज पूर्ण करण्यासाठी डॉक्टरांनी त्यांना हा आहार घेण्यास सांगितले होते. या संपूर्ण उपचारांच्या काळात डॉक्टर आणि नर्सेस यांनी त्यांची विशेष काळजी घेतली. संयोगिता भावे यांनी सांगितलेला हा प्रवास केवळ आजाराशी लढण्याचा नसून, मानसिक खंबीरपणा आणि कठीण परिस्थितीतही सकारात्मक राहण्याचा अनुभव देणारा आहे.
स्रोत: मूळ बातमी
Leave a Reply