दोन्ही राष्ट्रवादी काँग्रेसचे विलिनीकरण होणार असल्याची चर्चा गेल्या काही दिवसांपासून सुरू आहे. या पार्श्वभूमीवर काँग्रेसचे ज्येष्ठ नेते पृथ्वीराज चव्हाण यांनी मोठे विधान केले आहे. शरद पवार भाजपसोबत जाणार नाहीत, असा विश्वास त्यांनी व्यक्त केला. मात्र दोन्ही गट एकत्र येऊन तिकडे गेले तर काँग्रेसची ताकद थोडी कमी होईल, असेही चव्हाण म्हणाले.
शरद पवार रुग्णालयात असताना राष्ट्रवादी अजित पवार गटाचे नेते प्रफुल्ल पटेल यांनी त्यांची भेट घेतली होती. तेव्हापासून दोन्ही राष्ट्रवादीच्या विलिनीकरणाची चर्चा पुन्हा सुरू झाली. त्यानंतर प्रदेशाध्यक्ष सुनील तटकरे यांनीही मोठा दावा केला होता. अजित पवार असते तर १२ फेब्रुवारी रोजीच विलिनीकरण झाले असते, असे तटकरे म्हणाले होते.
राऊत यांच्या दाव्यावरूनही चर्चा
तटकरे यांच्या दाव्यानंतर शिवसेना ठाकरे गटाचे नेते आणि खासदार संजय राऊत यांनीही मोठा दावा केला होता. राष्ट्रवादीचे वीस ते बावीस आमदार फुटणार असल्याचे राऊत म्हणाले होते. मात्र अजित पवार गटाकडून हा दावा फेटाळून लावण्यात आला. राऊत यांच्यावर त्यानंतर चांगलाच हल्लाबोलही करण्यात आला. या सर्व घडामोडी सुरू असतानाच चव्हाण यांनी आपले मत मांडले आहे.
चव्हाण नेमके काय म्हणाले?
शरद पवार साठ वर्षांनंतर भाजपसोबत गेले तर तो त्यांचा वैयक्तिक स्वार्थ असेल, असे चव्हाण म्हणाले. परंतु असे होणार नाही, असेही त्यांनी स्पष्ट केले. मला नाही वाटत ते असे करतील. शेवटी त्यांचा पक्ष आहे, निर्णयही त्यांचा असेल, असे चव्हाण म्हणाले. मात्र दोन्ही पक्ष एकत्र येऊन जर ते तिकडे गेले तर आमची ताकद थोडी कमी होईल, असेही ते म्हणाले. तसे झाले तर देशात दोनच विचारधारा राहतील, असेही चव्हाण यांनी म्हटले आहे.
यावेळी चव्हाण यांनी सोनिया गांधी यांच्याबाबतही आठवण सांगितली. त्यावेळी सोनिया गांधी यांनी अध्यक्षपदाचा तडकाफडकी राजीनामा दिला होता. परंतु कार्यसमितीच्या आग्रहाखातर त्यांनी आपला राजीनामा मागे घेतला. राजीव गांधी यांच्या निधनानंतर परत इटलीला या, असा त्यांच्यावर दबाव होता. मात्र त्यांनी भारतीय मायभूमीचा स्वीकार केला, असेही चव्हाण म्हणाले.
स्रोत: मूळ बातमी
Leave a Reply