वीकेंडला काही खास बनवायचे असेल तर बोनलेस चिकन करी हा उत्तम पर्याय आहे. नेहमीच्या चिकन आणि मटणाच्या प्रकारांऐवजी ही डिश नक्की ट्राय करून पाहता येईल. बोनलेस चिकन करी केवळ चवीला उत्तमच नाही, तर बनवायलाही खूप सोपी आहे. दुपारच्या आणि रात्रीच्या जेवणासाठी रोटी, नान किंवा भातासोबत ती सर्व्ह करता येते.
बोनलेस चिकन करी बनवण्यासाठी साहित्य
चिकन मॅरीनेट करण्यासाठी: ५०० ग्रॅम चिकन (१ इंचाचे तुकडे), २ टेबलस्पून लिंबाचा रस, २ चमचे काश्मिरी लाल तिखट, अर्धा टीस्पून हळद आणि १ टीस्पून मीठ.
करीसाठी: ५ चमचे मोहरीचे तेल, २ तमालपत्र, २ इंच दालचिनीचा तुकडा, ५-६ काळी मिरी, ५-६ लवंगा, २-३ सुक्या लाल मिरच्या, २ कप बारीक कापलेले कांदे, अर्धा कप बारीक चिरलेला टोमॅटो, २ चमचे आले-लसूण पेस्ट, ३-४ हिरव्या मिरच्या (अर्ध्या कापलेल्या), २ चमचे चिरलेली कोथिंबीर, अर्धा कप साधे दही, २ चमचे धणे पावडर, अर्धा टीस्पून गरम मसाला, अर्धा टीस्पून जिरे पावडर आणि १ कप पाणी.
बोनलेस चिकन करी बनवण्याची पद्धत
आधी चिकन मॅरीनेट करण्यासाठी एका मोठ्या भांड्यात चिकन, हळद, मीठ, लाल तिखट आणि लिंबाचा रस घालून सर्व नीट मिक्स करावे. भांडे झाकून ३० मिनिटे बाजूला ठेवावे.
करी बनवण्यासाठी प्रथम मध्यम आचेवर प्रेशर कुकर ठेवून त्यात तेल गरम करावे. तेल गरम झाल्यावर त्यात तमालपत्र, दालचिनी, काळी मिरी, लवंगा आणि लाल मिरची घालून ४-५ सेकंद परतून घ्यावे. यानंतर कांदा टाकून तो हलका तपकिरी होईपर्यंत भाजून घ्यावा आणि अधूनमधून ढवळत राहावे. आता कुकरमध्ये आले-लसूण पेस्ट आणि हिरवी मिरची टाकावी. कांदा चांगला तपकिरी होईपर्यंत परतून घ्यावा. यानंतर कुकरमध्ये धने पावडर, गरम मसाला आणि जिरेपूड घालून २० ते ३० सेकंद परतून घ्यावे.
आता कुकरमध्ये आधी मॅरीनेट केलेले चिकन घालून आणखी ५ मिनिटे परतून घ्यावे. त्यात टोमॅटो आणि दही घालून अधूनमधून ढवळत राहावे आणि आणखी ५ मिनिटे शिजवावे. आता कुकरमध्ये पाणी घालून सर्व नीट मिक्स करावे. कुकरचे झाकण बंद करून २ शिट्ट्या होईपर्यंत चिकन मंद आचेवर शिजवावे. २ शिट्ट्या झाल्यावर चिकन गॅसवरून उतरवावे. बोनलेस चिकन करी तयार आहे. रोटी, नान किंवा भातासोबत गरमागरम सर्व्ह करावे.
स्रोत: मूळ बातमी
Leave a Reply