गेल्या काही दिवसांपासून दोन्ही राष्ट्रवादीच्या विलिनीकरणाची जोरदार चर्चा सुरू आहे. या चर्चेदरम्यान आता दिल्लीत एक महत्त्वाची बैठक पार पडली आहे. राष्ट्रवादी शरद पवार गटाच्या नेत्या खासदार सुप्रिया सुळे आणि राष्ट्रवादी अजित पवार गटाचे ज्येष्ठ नेते प्रफुल्ल पटेल यांच्यात सुमारे ३५ मिनिटे चर्चा झाली.
संसद परिसरात ३५ मिनिटे चर्चा
सूत्रांकडून मिळालेल्या माहितीनुसार, दिल्लीत संसद परिसरात सुप्रिया सुळे आणि प्रफुल्ल पटेल यांच्यात जवळपास ३५ मिनिटे चर्चा झाली. या बैठकीनंतर प्रफुल्ल पटेल आणि राष्ट्रवादी अजित पवार गटाचे प्रदेशाध्यक्ष सुनील तटकरे यांचीही बैठक झाल्याची माहिती सूत्रांकडून मिळत आहे. विलिनीकरणाच्या चर्चेच्या पार्श्वभूमीवर या बैठकांना महत्त्व प्राप्त झाले आहे.
विलिनीकरणाच्या चर्चेला वेग
राष्ट्रवादी शरद पवार गटाचे अध्यक्ष शरद पवार रुग्णालयात असताना राष्ट्रवादी अजित पवार गटाचे नेते प्रफुल्ल पटेल यांनी त्यांची भेट घेतली होती. या भेटीनंतर पुन्हा एकदा दोन्ही राष्ट्रवादीच्या विलिनीकरणाच्या चर्चेला वेग आला आहे. त्यानंतर राष्ट्रवादी अजित पवार गटाचे प्रदेशाध्यक्ष सुनील तटकरे यांनीही विलिनीकरणाबाबत मोठे वक्तव्य केले होते. विलिनीकरणाची सध्या कोणतीही चर्चा नाही, मात्र अजित पवार असते तर १२ फेब्रुवारी रोजीच विलिनीकरण झाले असते, असे तटकरे म्हणाले होते. त्यानंतर दोन्ही गटात घडामोडी सुरूच आहेत. या पार्श्वभूमीवर आजची बैठक महत्त्वाची मानली जात आहे.
Leave a Reply