जळगाव : अजिंठा चौफुलीचे सुशोभीकरण करण्यासाठी लागणाऱ्या खर्चाला मंजुरी मिळाली आहे. या पार्श्वभूमीवर चौफुली येथील सर्कलमध्ये पद्मपाणी बुद्ध यांची मूर्ती बसवणे, रस्त्यावर अजिंठा गेटची प्रतिकृती उभारणे आणि सर्कलवर अजिंठा लेणीतील निवडक भित्तीचित्रे चित्रित करणे, अशा मागण्यांचे निवेदन अजिंठा हाउसिंग सोसायटीन उपमहापौर मनोज चौधरी यांना दिले. निवेदनासोबत साहित्यिक जयसिंग वाघ यांच्या संकल्पनेतील संकल्पचित्र जोडण्यात आले आहे.
अजिंठा लेणीचे प्रवेशद्वार म्हणून ओळख
संकल्पचित्राविषयी माहिती देताना जयसिंग वाघ यांनी सांगितले की, जळगाव शहर सुवर्ण नगरी आणि केळीचे शहर म्हणून ओळखले जाते, त्याचप्रमाणे ते अजिंठा लेणीचे प्रवेशद्वार म्हणूनही ओळखले जाते. शहरापासून अवघ्या ४९ किलोमीटर अंतरावर जगप्रसिद्ध अजिंठा लेणी आहेत. त्यामुळे लेणीची ओळख निर्माण करणारे गेट, चित्र आणि मूर्ती अजिंठा चौफुलीवर साकारल्यास अजिंठा चौक एक प्रेक्षणीय स्थळ म्हणून ओळखला जाईल आणि शहराच्या सौंदर्यात भर पडेल, असे त्यांनी सांगितले.
आयुक्तांसोबत बैठकीचे आश्वासन
संकल्पचित्र पाहून उपमहापौर मनोज चौधरी यांनी सकारात्मक प्रतिसाद दिला. या संदर्भात लवकरच आयुक्तांसोबत बैठक घेऊन त्यावर निर्णय घेतला जाईल आणि त्या बैठकीस सोसायटीच्या प्रतिनिधींना बोलावले जाईल, असे त्यांनी सांगितले. निवेदन देताना ज्येष्ठ साहित्यिक जयसिंग वाघ, चेअरमन दिलीप सपकाळे, ॲड. आनंद कोचुरे, दिलीप तासखेडकर, अशोक सैंदाणे आणि नथू अहिरे आदी उपस्थित होते.
स्रोत: मूळ बातमी
Leave a Reply